Кәрәкәс авылында яшәүче Әмир Вазагиев остаханәсендә эш иртәдән башлана. Кышын канатлы дусларга җимлекләр ясап сөендерсә, хәзер ул сыерчыкларга оя әзерли.
Әмир әфәнде иртәдән кичкә кадәр остаханәсендә: берсен шомарта, икенчесен ясый – станок тавышының тынып торганы юк. Төнлә торып яраткан шөгылен кулына алган чаклары да бар.
Җимлекләр, кош оялары гади генә түгел, бизәкләп, сырлап эшләнгән. Минем эшләрем кешегә файда китерсә, үзе бер куаныч, ди оста. Аның бер эше икенчесен кабатламый, һәркайсы үзенчәлекле. Һәр өлешен ясау тырышлык һәм вакыт таләп итсә дә, аларны ябыштырып беркетү үзе аерым шөгыль.
35 ел элек шәһәрдән Кәрәкәскә күченеп кайтып, бабасы нигезен дә үзе яңарта ул. Йорт эчендә дә күп әйбер агачтан эшләнгән. Аның заманча итеп бизәкләр уеп ясалган сандыклары инде күп өйнең бизәге булып тора. Агач эшенә хирыслыгы бабасыннан килә. Хәзер исә үзе оныкларына кечкенә өстәл-урындыклар, сандыклар ясап куйган. Вазагиевлар ихатасында һәр парлы сыерчык гаиләсенә аерым оя. Ояларны оста ике-өч ел саен яңартып тора.
Хезмәтен һәм бәхетен авылда тапкан Әмир Вазагиев осталыгына сокланмый мөмкин түгел. Киләчәктә дә илһам һәм иҗади уңышлар теләп калабыз.
Алия Галиуллина, Елена Маврина, Александр Тимофеев, Максим Майоров, Татарстан яңалыклары, Зәй районы.
