Буа шәһәрендә халык санын исәпкә алу буенча стационар участок эшли. Шулай ук исәпкә алучылар йортлар буенча йөри, исәпкә алу кәгазьләрен электрон рәвештә дәүләт хезмәтләре порталында да тутыручылар бар.
Стационар участок күпфункцияле үзәк бинасында урнашкан. Теләгән һәр кешегә халык санын алуда шунда килеп катнашу мөмкинлеге бар. Сорауларга җавап телдән бирелә. Документларны раслау таләп ителми.
Халык санын алуда катнашучыларга утыздан артык сорау бирелә. Соарулар кешенең яше, җенесе, гражданлыгы, туган урыны, милләте, белеме, балалары саныннан тыш, яшәү шартларына да кагыла.
Халык санын алуда катнашучыларның төгәл исәбен көн ахырында санап чыгаралар. Участокка көн саен дистәләрчә кеше килә. Исәпкә алучыларга волонтерлар да булыша. Көнгә дүртәр сәгать эшлиләр.
Без кешеләрне халык санын алучы янына алып киләбез. Сорауларына ачыклык кертәбез, талоннар алуда булышабыз.
Ковидтан саклану чаралары үтәлә. Исәпкә алучылар прививка ясаткан, битлек режимын саклыйлар, антисептик препаратлар куелган. Дистанция саклана.
Халык санын исәпкә алу 14 ноябрьгә кадәр дәвам итә.
Алсу Сәмигуллина, Илнур Кадыйров. Татарстан яңалыклары, Буа районы.
