Азнакай районында сабанчылар ярышы быел 9 нчы ел рәттән үткәрелде. Карамалы авылы җирлегендәге “Таллы-Бүләк” хуҗалыгында 17 механизатор арасыннан иң осталарны ачыкладылар. Тулырак киләсе репортажда. Ярышлар район башлыгы Марсель Шәйдуллин тәбрикләве белән башланып китте. Әләм күтәрү хокукына узган елгы җиңүчеләр – Алмаз Шәехов белән Рафаэль Аптикаев ия булды. Озак еллар авыл хуҗалыгы өлкәсендә эшләгән ветераннар, туган көннәрен билгеләп үтүчеләр хөрмәтләнде.
Ярышта катнашучылар җирне каплатып, ягъни сабан белән сөрүдә, туфракның өстен сыйфатлы эшкәртүдә осталыкларын күрсәтте.
Һәр механизатор алдына бирелгән участокны уртадагы таяктан үлчәп сөрә башлау, дөрес итеп каплату, чүп үләннәрен юк итү бурычы куелды. Туфракны каплатмыйча сөрүдә Рафаэль Аптикаевка тиңнәр булмады. Ул быел да беренче.
Сабан белән сөрүдә “Таллы Бүләк” хуҗалыгыннан Илһам Хәсәншин җиңеп чыкты.
Азнакай осталары хәзер бар көчләрен малларга кышка азык запасын туплауга туплады.
Фәнис Мөхәммәтов.
