Бүген без авыл хуҗалыгына багышланган яңа сәхифә тәкдим итәбез. Биредә без авыл хезмәтчәннәре, алар җитештергән продукөия, гомүмән республикабызны азык төлек белән тэәмин итүчеләр турында сөйләрбез. Сүзне хезмәттәшем Динә Нәҗметдиновага бирәм.
.
Агросәнәгать комплексы республика икътисадының мөһим тармакларының берсе булып тора. Бу хакта Рөстәм Миңнеханов Дәүләт Советына Юлламасында белдерде.
Татарстан Президенты искәрткәнчә, быел бөртекле культуралардан 5 миллион тоннадан артык ашлык җыелган. Шикәр чөгендеренең тулаем җыемы ике миллион тоннадан аз гына кимрәк, ә май культуралары — 600 мең тонна тәшкил итә. Татарстан продукциянең төп төрләре белән тулысынча тәэмин ителгән һәм шактый күләмдә республикадан читкә җибәрү мөмкинлегенә ия.
Юлламаны игълан иткәннән соң, вице-премьер — Татарстан Республикасы авыл хуҗалыгы һәм азык-төлек министры Марат Җаббаров үз тәэсирләре белән уртаклашты.
Ә юлламаны игълан итүгә бер көн кала, Рөстәм Миңнеханов авыл хезмәтчәннәрен һөнәри бәйрәмнәре белән котлады. Авыл хуҗалыгы һәм эшкәртү сәнәгате хезмәткәрләре көненә алдынгы механизаторлар, агрономнар, терлекчеләр, зоотехниклар, машина белән сыер саву операторларын хөрмәтләделәр.
Хәтта бәйрәмнәрдә дә җитештерү мәсьәләләре турында сөйләшү гадәткә кергән. Бу очракта беренче чиратта Республика Президенты алдынгыларга бүләкләр тапшырды, рәхмәт сүзләрен җиткерде, шулай ук Рөстәм Миңнеханов саннарны ассызыклап үтте.
5 миллион тоннадан артык ашлык, шикәр чөгендере уңышы, рекордлы сөт саву һәм авылга дәүләт ярдәме программаларын уңышлы гамәлгә ашыру Татарстанның азык-төлек иминлеген тәэмин итүдә зур ышаныч тудыра.
Иң яхшы механизаторлар, агрономнар, зоотехниклар, машина белән сыер саву операторлары, хуҗалыклар җитәкчеләре һәм фермерлар лаеклы рәхмәт сүзләрен ишеттеләр, кайберләренә мактаулы исемнәр бирелде. Аларны авыл хуҗалыгы һәм азык-төлек министрлыгы җитәкчеләре, профильле парламент комитеты башлыгы котлады.
