Республиканың кайбер районнары уракка төште. Узган ел белән чагыштырсак, уңыш күрсәткечләре артык сөендерерлек түгел, булганын вакытында җыеп бетерергә кирәк дип максат куйган, крестьян фермер хуҗалыклары.
Күптән түгел республикабыз Беларусь республикасыннан килгән кунакларны кабул итте. Кулланучылар җәмгыяте Белоруссия республикасы берлеге идарә башлыгы Оксана Скиндер һәм «Полоцкий рынок» кооператив-сәүдә предприятиесе директоры Диана Кузикова Татарстанга эш сәфәрен кылдылар.
Авыл хуҗалыгы һәм азык-төлек министры урынбасары Рөстәм Гайнулов кунакларның барлык сорауларына җавап бирде. Шулай ук кунаклар Әлки муниципаль районында урнашкан җитештерү предприятиясендә дә булдылар.
Узган атнада Казанда Халыкара кооперация көне булып узды. Әлеге бәйрәмдә хөрмәтле кунаклар да катнашты, шуларның берсе Россия Үзәк берлеге Советы башлыгы Дмитрий Зубов. Шул уңайдан сессия утырышы булып узды, биредә булучылар кайбер җитди мәсьәләләр буенча фикер алышты. Шулай ук Бәйрәм кысаларында, кулланучылар кооперациясе оешмаларына тантаналы рәвештә махсус автомобильләр тапшырылды һәм “Автолавка” монументы ачылды.
Татарстан Республикасы Премьер-министры урынбасары, Авыл хуҗалыгы һәм азык-төлек министры Марат Җаббаров Татарстан кулланучылар җәмгыятьләре һәм кооперативлары җитәкчеләренә 16 махсуслаштырылган автомобиль ачкычларын тапшырды. Машиналар күчмә сәүдә оештыру, авыл хезмәтчәннәренә көн саен кайнар икмәк китерү, республикада әзерләү һәм җитештерү тармагы өчен бик кирәк.
Бүгенге көндә Татарстанда һәр дүртенче кеше авыл җирлегендә яши, халык өчен уңай шартлар булдыру, яшәү дәрәҗәсен күтәрү бик мөһим. Әлеге сөенечле хәбәр белән авыл халкын Үзәк берлеге башлыгы Дмитрий Зубов та котлады.
Парламент Рәисе урынбасары Марат Әхмәтов, авыл хуҗалыгы үз продукциясен җитештерсен өчен , халыкка бөтен яклап ярдәм итәргә кирәк дип саный. Һәм әлеге сорау уңай борылыш алсын өчен барлык мөмкинлекләр белән файдаланырга кирәклекне әйтеп узды.
Кулланучылар кооперациясе беренче чиратта авыл халкының мәнфәгатьләрен кайгыртырга тырыша. Авыл кешесен кирәкле товар, продукция, эш урыны белән тәэмин итүне максат итеп куя.
