Чирмешән районында предприятиеләр, оешмалар, авыл җирлекләре арасында волейбол буенча район беренчелеге ярышлары башланды. Районда спортның төрле төрләре буенча мондый ярышлар даими уза. Хәзер бу төбәк массакүләм спортны үстерү буенча иң яхшы авыл районнарының берсе булып санала. Уңышларның сере районда берничә ел эчендә республика Президенты программалары буенча төзелгән спорт объектларын дөрес куллану нәтиҗәсе дә.
Марина Колесникова 25 еллык тренерлык эшчәнлегендә шәхси һәм команда медальләренең күпме булуын төгәл генә үзе дә әйтә алмый. Ул спортның берничә төре буенча район, республика ярышларында күп тапкырлар җиңүче. Ә физкультура дәресләрендә, секцияләрдә тәрбияләнүчеләргә гер белән оста эш итүен күрсәтә.
Иске Элмәле мәктәбе укучылары физкультура дәресләреннән тыш, буш вакытларда чаңгыда йөриләр, волейбол, баскетбол уйныйлар. Кичләрен спорт залы беркайчан да буш тормый.
Күп кенә авылларда балалар үзләрендәге, шулай ук район үзәгендәге ярышларда да катнашалар. Заманча спорт корылмалары һәм заллар җитәрлек. Менә Лашманнан яшь көрәшчеләр «Чирмешән» спорт мәктәбенә чираттагы күнегүләргә килде. Татарча көрәш буенча тренер Рафыйк Гатин физкультура һәм спорт һәр тәрбияләнүчегә күп нәрсә бирә, дип саный.
Степан Хачатурян Чирмешәнгә берничә ел элек Әрмәнстаннан күчеп килгән. Самбо һәм дзюдо буенча Советлар Союзы чемпионы. Татарстанның кечкенә генә район үзәгендә яхшы сыйфатлы спорт объектларының күплегенә соклануын яшерми.
Универсаль спорт залында бокс, мини-футбол, волейбол буенча спорт секцияләре эшли. Биредә төрле яшьтәге йөзләгән кеше шөгыльләнә, сәламәтлекләрен ныгыта. Дәресләр төгәл расписание буенча уза, чөнки теләүчеләр күп.
Менә волейбол буенча район беренчелегенә әзерләнүче төркем. Бу көннәрдә ярышлар муниципалитет оешмалары, предприятиеләре һәм җирлекләре арасында уза.
Ә монысы боз спорт сарае. Барлык күнегүләр, турнирлар алдан билгеләп куелган. Уңышлары да бар. Чирмешән хоккейчылары- күп тапкырлар республика һәм зона ярышлары җиңүчесе.
Биредә йөзү бассейннарында, урам мәйданчыкларында, кадет интернат – мәктәбендә дә спорт белән шөгыльләнәләр, сәламәт яшәү рәвеше алып баралар. Шәкертләргә гоуми физик әзерлек, кул сугышы аеруча ошый.
Чирмешәнлеләр спорт белән шөгыльләнү мөмкинлеге өчен рәхмәт белдерәләр. Республика президенты программалары һәм нефтьчеләр ярдәме булмаса, бу хакта хыяллана да алмаслар иде.
Дмитрий Второв, Владимир Юрков, Илдар Сафиуллин, Татарстан яңалыклары, Чирмешән районы.
