Түбән Яхшый авылы халкының бергә җыелып утыру урыны, бәйрәмнәр үткәрү өчен үз клубы бар. Күп еллардан соң биредә төзекләндерелгән мәдәният учагы үз ишекләрен ачты. Иҗат төркеме күңелле бәйрәм мизгелләре шаһитлары булды.
Түбән Яхшый авылыннан җыр-моң да агылачак хәзер. 2019 елдан бирле бер генә мәдәни чара да узмаган авылда янәдән тормыш яңара. Капиталь төзекләндерүдән соң үз ишекләрен ачкан мәдәният йорты, авыл халкы өчен яңа мөмкинлекләр ача.
Әлеге бина 1976 елда төзелеп кулланылышка тапшырыла. Еллар узган саен аның диварлары тузып, ул яраксыз хәлгә килә . 2019 елда әлеге иске клубны бөтенләй үк ябып куялар. клубның яраксыз булып ятуына битараф кала алмаган җитәкче – шушы авылда туып үскән Ильяс Мирзаянов клуб төзекләндерү эшенә алына.
Әлеге клубта уздырылган бер генә чарадан да читтә калмаган Зөһрә апа Салахова клубның гөрләп торган чакларын бүгенгедәй хәтерли.
Әлеге вакыйга мәдәният йортына барча авылдашларны, кунакларны җыйды.
Түбән Яхшый авылы халкының шатлыгын район башлыгы да уртаклашты.
Тумышы белә шушы авылдан булган Илһам Хисматуллин белән җирле халык чиксез горурлана.
Клуб янында авыл халкы өчен сый — нигъмәтләр әзерләнгән иде. Зур казанда шулпа, пылау пеште, җыр – моң яңгырап торды.
Регина Салахова, Ләлә Зәйнуллина. Татарстан яңалыклары, актаныш районы.
