Көнбатышның икътисади санкцияләре илебезнең агросәнәгать комплексы эшчәнлегенә зыян китерә алмый. Республикабызның күп кенә фермерлары, товар җитештерүчеләр шулай дип саный. Чит ил орлыкларыннан, ашламалардан һәм авыл хуҗалыгы техникасыннан баш тарткан хуҗалыкларга отышлы. Мондый мисаллар Лаеш районында да бар.
«Атабай» агрофирмасында кош ите җитештерү масштабы хәтта белгечләрне дә гаҗәпләндерә. Инде берничә ел ул тулы цикллы предприятие. Каз йомыркасы чыгарудан алып, кошларны үстерү, сугым цехына, әзер продукцияне сатуга кадәр. Хуҗалыкның каз бәбкәсе инкубаторы боксларында йомырка бер ай дәвамында билгеле бер температурада тора. Аннан казларны үстерүгә күпләп саталар. Ихтыяҗ арта бара.
Илшат Мусин сүзләренә караганда, Көнбатыш санкцияләре җитештерү процессына берничек тә йогынты ясамаган. Барлык азык, ашлама, хәтта терлек-үзләренеке. Савым сыерлары бар. Смоленскидан токымлы таналар кайтарылган. Биредә алар яхшы ияләшкәннәр – мул сөт бирәләр. Техника арасында күәтле зур тракторлар бар. Бу агрегат Киров өлкәсеннән сатып алынган.
Техника, машиналар язгы кыр эшләренә әзер, орлыклар, ашлама җитәрлек.
Авыл хезмәтчәннәре быел киштәләрдә сыйфатлы продукция күбрәк булыр, дип өметләнә. Мөмкинлекләр бар, фермерлар соңгы елларда бай тәҗрибә туплады.
Дмитрий Второв, Дамир Мөхәммәтханов, Илдар Сафиуллин, Татарстан яңалыклары, Лаеш районы.
