Апас раойнында да “Батырлар” мемориал комплексында төзекләндерү эшләре бара.
Җәй айлары – төзекләндерү чоры. Бу вакытта районнарда генә түгел, барлык авыл биләмәләрендә дә эшнең кайнаган чагы. Тиздән Апасның үзәк урамнарында да үзгәрешләр көтелә.
Апас үзәгендә Бөек Ватан сугышында Җиңүнең 65 еллыгына багышланган мемориаль комплекс 2010нчы елның язында төзелгән. 5 метр биеклектәге мәрмәр дивар ике блокка бүленгән: «Алар Ватан өчен һәлак булдылар» һәм «Алар җиңү белән кайттылар». Биредә Бөек Ватан сугышы кырларында сугышкан якташларның исеме мәңгеләштерелгән.
Комплекс үзәгендә Мәңгелек ут яна. Бу көннәрдә Мемориал мәйданында төзүчеләр эшли. Икенче елга халкыбыз Бөек Җиңүнең 80 еллыгын билгеләп үтәчәк. Әлеге юбилей уңаеннан район башлыгы Айрат Җиһаншин Батырлар мемориал комплексын яңартырга уйлаган.
Район хисабыннан төзелеш эшләре башланып та киткән. Бу – беренче этап. Мәйданның биеклеге күтәрелә, бердәм мәйдан ясала, һәм заманча технология белән брусчатка җәеләчәк. Төзекләндерү эшләренең икенче этабы район мәдәният йорты каршында дәвам итәр дип көтелә.
Алия Галиуллина, Гөлназ Вәлиева, Татарстан яңалыклары, Апас районы.
