Республикада тулы күәткә малларга кышкы чорга терлек азыгы әзерләү эшләре дәвам итә. Бу авыл хуҗалыгы җитештерүчеләре өчен бик кызу вакыт. Әйтик Апас районында хуҗалык хезмәтчәннәре әлеге эшкә инде июньдә үк керештеләр. Бүгенгә районның Урта Балтай бүлекчәсендә 1 тонна 300 кг сенаж әзерләнгән.
Авыл хуҗалыгы тармагында бүгенге көн кадагында торган мөһим мәсәлә – терлек азыгы әзерләү. Апас районыда да аграрийлар алны-ялны белми эшлиләр. Коштаулы авылыннан Рәфис Гайнетдинов тракторы белән яшел массаны кырдан ташып тора. Ул аграр көллиятен тәмамлап, ил алдындагы изге бурычын намус белән үтәп кайтканнан соң, туган авылында төпләнеп кала.
Кече Бакырчы авылыннан Наил Рәхимов та үз һөнәрен зур җаплылык белән башкара. Аңа трактор белән яшел массаны сенаж базларына һәм курганнарга кайтару йөкләнгән. 40 елдан артык техника иярләүче тәҗрибәле хезмәткәр эшенең авырлыгын сизмим ди.
Илһам Халиков мал азыгы хәзерләү комбайнында эшли. Ул яшел үләнне җыеп, ваклап, трактор һәм йөк машиналарына төятеп бара.
Апас раойнының Түбән Балтай авылы фермасы янәшәсендә 600 тонна сыйдырышлы сенаж курганы урын алган. Биредә яшь хезмәткәр Илназ Сибгатуллин тракторы белән барлык таләпләрне төгәл үтәп, яшел массаны тыгызлап, таптатып тора. Илназ үзе аграр көллиятендә укый. Җәен хуҗалыкка килеп, хезмәт күнекмәсе дә ала.
Быел Горбунов берләшмәсендә игътибарны күбрәк сенаж әзерләүгә юнәлткәннәр. Берләшмәдә барлыгы 4000 башка якын мөгезле эре терлек исәпләнә. Аларны кышлату өчен 17 000 тонна сенаж әзерләнергә кирәк”,- ди берләшмәнең баш зоотехнигы Илсур Хәсәнов. Ул үзе инде 52 ел дәвамында авыл хуҗалыгы өлкәсендә хезмәт итә.
Гөлназ Вәлиева, Чулпан Сабирова, Татарстан яңалыклары.
