Апас районы Түбән Барыш авылында яшәүче Бибинур Садриева шушы көннәрдә 90 яшьлек юбилеен каршылады. Аның янына өй тутырып балалары, оныклары, оныкчыклары, туганнары җыелды, җитәкчеләр килде. Акъәбигә матур теләкләр аша район башлыгының котлау открыткасы, чәчәк бәйләме, бүләк тапшырылды.
Тирә-якка йөзеннән иман нуры, күңеленнән җылылык, игелек чәчелеп тора Түбән Барышта яшәүче Бибинур Садриеваның. Ап-ак яулыгын бөркәнгән чып-чын татар әбие — ул.
Картлыгың бәхетле булсын дисәң, яшьлегеңдә ялкау булма. Бибинур әби бар гомерен басу-кырларда, фермаларда хезмәт итүгә куйган. Кайда гына тир түксә дә, эшнең күзенә басып, җиренә җиткереп эшләгән.
Әби авырлыкларны да күп күрә, күп кичерә. Бик яшьли ире бакыйлыкка күчә. Сыңар канат белән ул 10 бала үстерә. Бала югалту ачысын да кичерә. Берсе тугач ук вафат була. Ә икесен олыгайган көнендә югалта. Бүгенге көндә ул 7 баласының, онык-оныкчыкларының, якыннарының кайгыртуын тоеп, тәрбиядә яши.
Бу гаилә — һәркем өчен үрнәк. Аларны дуслык, татулык берләштерә. Игелекле, эшчән балалар үстергән бәхетле ана – Бибинур әби, гомер көзләрен гаиләсе янәшәсендә шатланып каршылый.
Миләүшә Мусина, Гөлназ Вәлиева, Татарстан яңалыклары, Апас районы.
