Апас районы, Әлмәндәр берләшмәсе Күккүз бүлекчәсе кырларыннан эш барышы.
Республикада урып-җыю эшләре дәвам итә. Авыл хуҗалыгы һәм азык — төлек идарәсеннән алынган мәгълүматләргә караганда, бүгенге көндә төбәгебез буенча барлыгы 12870 гектар мәйданнан 33576 тонна ашлык җыеп алынган. Уңыш бер гектарга уртача 26,1 центнерны тәшкил итә. Әлмәндәр берләшмәсе Күккүз бүлекчәсе кырларында барган эш барышы хакында тулырак итеп алдагы язмада.
Әлмәндәр берләшмәсе Күккүз бүлекчәсенең 128 гектарлы арпа кыры… Биредә гөрләп урып — җыю эшләре бара. Басуда 7 комбайн эшли. Уңыш бер гектарга уртача 35 центнерга якын чыга.
Шаян, тапкыр телле, тырыш, эшчән Рифкать әфәнде Әхмәдуллин Әлмәндәр авылында яши. Ул ел әйләнәсе авыл хуҗалыгы өлкәсендә эшли. Хезмәттән бер дә куркып тормый. Бүгенге көндә Күккүз бүлекчәсенә булышырга килгән. Биредә трактор ярдәмендә су ташып тора. Аның барлыгы 40 еллык эш стажы бар.
Ринат Хәсәнҗанов та Әлмәндәр авылыннан. 2008нче елдан бирле комбайнда эшли. Бүгенге көндә аның ярдәмендә биредә икмәк суктыра.
“Күккүз” бүлекчәсендә быел 1000 гектар мәйданда көзге бодай, 800 гектарда язгы бодай, 750 гектар мәйданда арпа, 340 гектарда шикәр чөгендере җыеп алу бурычы тора. Бердәм булып эшли авыл хезмәтчәннәре. Комбайннар артыннан ук салам да төргәкләнеп барыла. Һәм урнаштырып та куела.
Алия Галиуллина, Гөлназ Вәлиева, Татарстан яңалыклары, Апас районы.
