Район фермер хуҗалыкларында комбайннар, календарьда гыйнвар ахыры булуга карамастан, кабат кырга чыкты — көнбагыш суктыралар. Көзен бозлы яңгырлар яуганга комбайннар кырда эшли алмады. Шуңа да уңышны җыю соңга калды. Кар каплаган кырда эшләү авыр биреләме? Бу хакта фермер Сәйдәш Мусин комбайнчыларыннан белештек.
Ап-ак кар каплаган кырны ялгыз комбайн иңли. Штурвал артында алтынчы сезонын эшләүче Ильяс Мусин. Урып-җыю эшләрендә азмы-күпме тәҗрибә туплаган егетнең көнбагыш сугуда, һәм, гомумән, бу эшне кышын башкаруда беренче чыныгуы.
Көнбагыш уңышын җыеп алу көзен һава шартлары начар булу аркасында кичектерелде быел. Салкыннар, бозлы яңгырлар эзсез узмады. Әмма Сәйдаш Мусин фермер хуҗалыгында үстерелгән уңышны әрәм итмичә, кышын булса да җыеп алырга булганнар. Әнә, хәзер культураны иртә таңнан төнгә кадәр суктыралар.
Крестьян-фермер хуҗалыгында көнбагыш 66 гектарда игелгән. Кыйммәтле культураны беренче чәчүләре. Бөртекләрне әлегә амбарга кайтаралар.
Көнбагышның беренче җыеп алган партиясен Чистайга озатканнар. Монысын май сыгу заводына тапшырырга ниятлиләр.
Алсу Сәмигуллина, Илнур Кадыйров, Татарстан яңалыклары
