Чирмешән районының Әмир авылы халкы тарихи вакыйга шаһиты булды. Биредә капиталь ремонттан соң авыл мәчете ачылды. Тулырак безнең махсус репортажда.
Ачылышны Татарстан мөфтие Камил хәзрәт Сәмигуллин Коръән аятьләре укып башлап җибәрде. Ул мәчеткә җыелган халыкка Раҗәб ае һәм аның фазыйләтләре хакында бәян итте. Рамазан ае, ураза тоту һәм изге айны үткәрү тәртипләре турында сөйләде.
Әмир авылының мәчете 1991 елда таштан салына. Авыл халкы алдына мәчетне зурайту бурычы килеп баса. Нәтиҗәдә бу эшне, авыл халкы белән киңәшләшеп, шул җирлектән чыккан иганәчеләр Әмир авылында туып үскән, күп еллар Сургут шәһәрендә эшләп гомер кичергән Фазыл һәм Миндар Әгъләмовлар башкарып чыгалар. Ә шушы җирлектә яшәүче Азат Ихсанов төзелеш бригадасы белән җитәкчелек итә.
Әлеге фидакарь затлар мөфти кулыннан рәхмәт хатлары алды. Тантанада шулай ук Чирмешән районы башлыгы Фердинат Дәүләтшин катнашты. Гыйбадәтханәне төзекләндерергә алынган эшмәкәрләрнең берсе, бик күп игелекле проектларны оештыручы, иганәче Миндар Әгъләмов үз чыгышында бу изге эшкә алынуы, зур күләмдә ремонт, төзекләндерү үткәрүе белән таныштырып үтте. 90-нчы еллар башында төзелгән мәчетнең таушалып баруына аның күңеле әрни, Чирмешән үзәгендә әнисе истәлегенә мәчет төзеткәннән соң, туган авылындагы гыйбадәт йортына ремонт ясатырга сүз бирә. Башта ике-өч айда тәмамлап булыр кебек тоелган эш шактый күп хезмәт сорый, мәчетнең бары диварлары гына калып, калган бар җире кабаттан төзекләндерелә, өстәп янкорма төзелә. Хәзер мәчеттә ир-атларга һәм хатын-кызларга намаз уку өчен иркен заллар, ифтарлар һәм ашлар үткәрү өчен махсус бүлмә, тәһарәтханә, ир-атлар һәм хатын-кызлар өчен аерым уку класслары бар.
Бертуган Әгъләмовлар туган авылларыннан еракта — Сургутта яшәсә дә, Әмир тормышын һәрвакыт кайгыртып тора, төрледән-төрле игелекле проектлар оештырып авыл халкына ярдәм итеп яши.
Авыл халкы да рәхмәтле.
Чирмешән районы мөхтәсибе Рамил хәзрәт Ибраһимов: “Яңартылып, төзекләндереп ачылган мәчеткә, Әмир авыл халкы тарафыннан Әгъләмовларның әтиләре исеме – Әгъзам исеме бирелде” дип игълан итте.
“Әгъзам” исеме, бөек, югары дәрәҗәле дигәнне аңлата. Димәк, әлеге Аллаһ йорты әмирлеләрне бөек эшләргә рухландырып торыр. Амин, шулай була күрсен!
Идел Кыямов, Кадрия Мерсиапова. Татарстан яңалыклары.
