“Бозауларны яшь бала караган кебек карыйм, хезмәтемне бик яратам”,- ди “Апас-мол” агрофирмасы Шыгай авылы фермасында эшләүче Илүзә Шәрәфиева. Ул 34 ел гомерен терлекчелек өлкәсенә багышлый. Бүгенге көндә 140 баштан артык бозау карый. Быел Илүзә Шәрәфиева Казан шәһәрендә оештырылган авыл хуҗалыгы һәм эшкәртү сәнәгате хезмәткәрләре көненә багышланган тантаналы чарада катнаша. Һәм биредә “Татарстан Республикасының Атказанган терлекчесе” исеменә лаек була.
Шыгай авылында яшәүче Илүзә Шәрәфиеваның һәр көне төнге икедә, өчтә үк башлана. Ул өйдәге эшләрен карап, таңгы дүртенче яртыга малкайлары янына килеп җитә. Терлекчелек өлкәсендә гомуми эш стажы 34 ел булса, шуның 10 елын ул бозаулар карый. “Апас-мол” агрофирмасының Шыгай авылы фермасында эшли.
Фермада һәр яңа туган бозау Илүзә Шәрәфиева кулы аркылы үтә. Бер бәйрәме, ялы булмаса да, зарланмый Илүзә апа. Һәркөнне маллары янына ашкынып килә.
Яхшы тәрбия, җанлы аралашу, сәламәт тукландыру малларга тизрәк үсәргә, авырлык җыярга ярдәм итә”, — ди тәҗрибәле хезмәткәр. Бүгенге көндә аның карамагында 140 баштан артык бозау бар. Алар өчен ул терлекче дә, табиб та.
Алдынгы терлекченең тырыш хезмәте җитәкчеләр тарафыннан да бәяләнә. Илүзә Шәрәфиева быел “Татарстанның Атказанган терлекчесе” исеменә лаек була. Әлеге зур бүләкне ул Казан шәһәрендә оештырылган авыл хуҗалыгы һәм эшкәртү сәнәгате хезмәткәрләре көненә багышланган тантаналы чарада республикабыз рәисе Рөстәм Миңнеханов кулыннан ала.
Эше авыр булса да, Илүзә Шәрәфиева үзе алдына куелган бурычны намус белән үти. Илебез табынын баетуга лаеклы өлешен кертә.
Гөлназ Вәлиева, Ләлә Зәйнуллина, Гадел Галиев.
