Республикбызда күп бала тәрбияләүче гаиләләр шактый. Үзләренең күңел җылысын сабыйларына өләшеп, җәмгыяттә дә матур уңышларга ирешеп килә алар.Алдагы видеоязмабыз да шундыйларның берсе Актаныш районының Мари Суксуы авылында гомер итүче 4 бала әнисе Миләүшә Арсланова турында.
Әлеге йортта урын алган һәр нәрсәдә аның күңел җылысы, чагыла. 4 бала анасы Миләүшә Арсланованы күпләр яхшы күңелле кеше буларак белә һәм хөрмәт итә.
Тумышы белән Миләүшә Арсланова Киров авылынннан. 4 балалы гаиләдә беренче сабый булып дөньяга килә. Әтисез калып, ятимлек ачысын татып үсә алар. Миләүшә ханым исә әнисенең зур терәге, ярдәмчесе була.
Үзе дә ишле гаиләдә үскәнгәдер, күп балалы ана булу хыялы аның күңелендә кечкенәдән үк бөреләнә. Тормыш иптәше белән гаилә корып җибәргәннән соң тәүге сабыйлары- кызлары дөньяга килә. Бер-бер артлы ике кызлары һәм ике уллары туа. Кулына нинди генә шөгыль алмасын, аны җиренә җиткереп башкара. Кечкенә кызларының йөрәк авыруы билгеле булгач та, үз — үзен тынычландырырга теләп ул кулына бәйләү җепләре ала. Һәм шул көннән алардан аерылмый.
Башта башмак, оеклар бәйләсә, хәзер күлмәкләр бәйләү белән мавыга Миләүшә ханым. Ул бәйләгән күлмәкләрнең саны дистәгә якын. Җәйләрен чәчәккә күмелеп утырган йортта, кышларын да матурлык өзелми. Арслановлар гаиләсенең күңел бизәге булган гөлләр тәрәз төбе тулы. Арада чит илдән кайтартылганнары да бар.Балаларының 4 се дә читтә. Атна ахрында сагынышып Туган йортларына җыела алар. Чөнки беләләр, биредә аларны тәмле сыйлары һәм җылы кочагы белән әниләре көтә.
Регина Салахова, Татарстан яңалыклары, Актаныш районы.
