Алдагы кышлату чорында малларны җитәрлек күләмдә яхшы сыйфатлы азык белән тәэмин итү өчен, республикабыз районнарында авыл хуҗалыгы предприятиеләрендә хезмәт фронтын киң җәелдереп эшлиләр.Шундыйларның берсе Актаныш районының “Әнәк” агрофирмасы хезмәтчәннәре. Бүгенге көндә алар басу-кырлардан сыйфатлы азык җыеп алу белән мәшгуль. 1 гектардан уртача 20-30 центнер терлек азыгы алына.
Әнәк агрофирмасы быелгы сенаж салу кампаниясенә 30 нчы майда керешә. Терлек азыгы әзерләү эшләрен Әтәс авылындагы бүлекчәдән башлыйлар. 1 гектардан 15 центнердан алып, 40 центнерга кадәр уңыш алына. Башка елларны уртача 700 гектардан 60 мең центнер азык сала торган булганнар.Быел исә бу сан 3 тапкырга кимрәк.
Уңыш мактанырлык булмаса да, хәзер аны җыеп алу өчен иң кулай вакыт. Мисал өчен люцернаның бутон чыгарган вакытында үсемлектә протеин аеруча күп була. Үсемлекләрнең сыйфаты белгечләр контролендә.
Терлек азыгы туплау эшләрен өзеклекләрсез башкарып чыгу өчен агрофирманың барлык хезмәтчәннәре дә бердәй тырыша. Техника да, эшче көчләр дә җитәрлек биредә.
Яңа Кормаш фермасының сенаж базындаике К-700 тракторы таптый. Биредә дә иң беренче чиратта сыйфатка игътибар бирелә. Азык 60 % дымлылык белән салына. Таптату ике сменада оештырылган.
Ел үзенчәлекле, масса аз, әмма бу хуҗалык хезмәтчәннәренең эшен киметми, киресенчә мөмкинлектән чыгып эшләүне дә күздә тота. Әнәк агрофирмасы җитәкчелеге исә һәр хезмәтне тиешенчә бәяләүне мөһим дип саный. Эшчеләргә хезмәт хакын центнердан түгел, гектардан түләү фикерен җиткерә.
Көннәр яхшы торганда терлек азыгы әзерләү эшләрен агрофирма кызу темпларда башкара. Терлекләргә азыкны мөмкин кадәр югалтуларсыз, җитәрлек күләмдә әзерләп куярга тырыша. Люцерна уңышын тәмамлагач, борчак, көзге бодай яки арпадан сенаж салуны күздә тоталар.
Алия Галиуллина, Альбина Солтанова, Марат Саррахов, Татарстна яңалыклары, Актаныш районы
