Актаныш районының “Таң” хуҗалыгы чәчүне районда беренчеләрдән булып төгәлләде. Кукуруз бик отышлы культура – быел аны 100 гектарда бөртек, 250 гектарда терлек азыгы өчен чәчкәннәр. Кырлардан безнең репортаж.
Хуҗалыкның тоткасы булган механизаторлар Айдар Гайнетдинов, Инсаф Гәрәев , Нияз Идрисов һәм Рәвис Идрисов звенолары төп чәчүне санаулы көннәрдә башкарып чыкты.
Вячеслав Абышев белән Раниф Хәсәнов чәчү алдыннан туфракны эшкәрткән. Әле быел гына кукуруз чәчү өчен махсус “Гаспардо” чәчкечен сатып алганнар. Агрегатны Диларис Мөхәммәтшинга тапшырганнар. Корыч айгырын кыю иярләгән Диларис “Таң” хуҗалыгында 13 ел эшли. Хәрби хезмәттән кайткач, шәһәрдә төпләнергә уйлаган егет шау-шулы тормышка ияләшә алмый, озак уйлап тормыйча, туган авылына кайта да, механизатор булып эшкә урнаша.
Арпа, бодай, борчак һәм солының элиталы яңа сортларын кайтартканнар. Яңа гына баш калкыткан уҗымнар азотлы ашлама белән тукландырыла, чүп үләннәренә, бөҗәкләргә каршы көрәш алып барыла.
Чәчүне бүлеп, 5-6 көн яуган яңгырлар да бик кирәкле вакытта, шифалы булды.
Ләйсән Газизова.
