Актаныш районында иң яхшы зоотехникларны, ветеринария табибларын, машина белән сыер саву операторларын, лаборантларны һәм ясалма орлыкландыру технологларын ачыкладылар. Быелгы конкурс 44 нче тапкыр “Алга” хуҗалыгында, Чуракай авылы җәйләвендә оештырылды.
Пандемия сәбәпле, быелгы конкурс көзге күчерелгән иде. Сыер саву аппаратларын тизлеккә сүтеп җыйган савымчыларның кулларына күз иярми, шулкадәр остарып беткәннәр. Теоретик белемнәрен дә күрсәттеләр. Аппаратны сыер савуга әзерләү, дөрес саву, сөтнең чисталыгы һәм майлылыгы баллар белән бәяләнде.
“Алга” хуҗалыгы савымчысы Валентина Андерьянова абсолют җиңүче булып танылды. Сыер савуда стажы бер ел гына булуга карамастан, өлкән апаларын да уздырды кыз. Бәйгедә катнашучыларны барлаганнан соң, авыл хуҗалыгына яшьләр килми дияргә тел әйләнми. Яшь савымчыларны ачыклау максатыннан, 35 яшькә кадәргеләр аерым хөрмәтләнде. Беренче урында- “Чишмә” агрофирмасы савымчысы Альбина Дәүләтова.
Районда мал табибларына кытлык, үз эшенең барлык нечкәлекләрен белеп башкаручы белгечләр җитешми. “Таң” хуҗалыгында баш табибны Башкортстаннан эзләп тапканнар. Илдар Таһиров зоотехниклар арасында җиңүче булды.
Районның баш ветеринария табибы Фиргать Абдрахманов зоотехник-табиблар алдына куйган төп бурыч- лейкозлы сыерларны бетерү.
Бәйге җиңүчеләрен район башлыгы Энгель Фәттахов котлады. Терлекчеләргә хезмәтләре өчен рәхмәт белдерде.
