Актаныш районы Иске Богады авылы мәдәният йортына капиталь ремонт ясалды. Төзекләндерү эшләре “Мәдәният” илкүләм проектының “Мәдәни мохит” программасы буенча финансланды. Авыл мәдәният йорты иҗат коллективы да миллион ярым сумлык грант откан булган.
Мәдәният йорты ярты гасыр элек эшли башлаган. 90 нчы елда ремонт ясалган, шуннан соң бер тапкыр да кул тимәгән. Бина нык искергән. Барысын да диварлардан алып түбәгә кадәр яңартканнар, җиһазлар сатып алганнар. Яңа елны каршылау алдыннан клуб ишекләрен кабат ачу – бай мәдәни мираслы Богады халкы өчен зур бәйрәмгә әйләнде.
Мәдәният йорты җитәкчелегенә тавыш җиһазлары алу өчен сертификат тапшыруга да сөенделәр. Тантанага килүчеләрне Кыш Бабай белән Кар Кызы да сәламләде. Район мәдәният йорты һәвәскәрләре, мәктәп укучылары әзерләгән музыкаль чыгышлар да бәйрәм рухын баетты. Ә Богады авылы халык театры “Гөргери кияүләре” спектакленнән өзекләр күрсәтеп, халыкны туйганчы көлдерде.
Актанышның данлыклы “Агыйдел” дәүләт җыр һәм бию ансамбле коллективы чыгыш ясап, авыл халкына зур бүләк ясады. Үз авыллары егете, Татарстанның халык артисты Азат Хөсәеновның җырлавы да нур өстенә нур булды.
Ләйсән Газизова, Татарстан яңалыклары, Актаныш районы.
