Россиядә яшәүче халык 2023 елның гыйнвар аеннан башлап бакча кишәрлекләрендә тавыклар һәм куяннар үрчетү мөмкинлеге алды. Моңарчы әлеге шөгыль өчен 20 мең сумга кадәр штраф каралган иде.
Хәзер авыл хуҗалыгы хайваннарын үз ихтыяҗларың өчен үрчетергә мөмкин, ләкин таләп ителгән законнар үтәлгән булырга тиеш. Шулай ук ветеринария нормаларын һәм санитар-эпидемиологик кагыйдәләрне саклау зарур. Законга буйсынмаучыларны штраф көтә. Исегезгә төшерәбез, авыл хуҗалыгы хайваннарын бакча участокларында үстерү турындагы канунны узган елның июлендә Россия Президенты Владимир Путин имзалады.
Марат Җәббаров Саба районында күркә йомыркасыннан чебиләр чыгару цехын ачу тантанасында булып кайтты. Шулай ук Авыл хуҗалыгы һәм азык-төлек министрлыгы белгечләре агросәнәгать комплексының узган елгы эшенә йомгаклар ясады. Февраль аенда Министрлык «ТатАгроЭкспо» агросәнәгать комплексы казанышларының бишенче махсуслаштырылган күргәзмәсен үткәрергә әзерләнә.
Саба районында инкубация йомыркасы репродукторы эшли башлый. Бу Словакиядә уйланылган һәм тормышка ашырылган проект. Ачылыш тантанасында вице-премьер — Татарстан Республикасы Авыл хуҗалыгы һәм азык-төлек министрлыгы башлыгы Марат Җәббаров катнашты. Башлангыч этапта 116 мең йомырка чыгаруга исәп тоталар. Инкубаторны Корсабаш авылында төзегәннәр. Проектның гомуми бәясе — 3 миллион евро. Киләчәктә 6 гектарга кадәр ферма төзү һәм эшләтеп җибәрү планлаштырыла.
Күптән түгел Марат Җәббаров 200 башка исәпләнгән сөтчелек комплексында булып кайтты. Әлеге крестьян-фермер хуҗалыгын Зөфәр Мөхәммәтшин җитәкли. Бүген анда терлекләр саны 1 мең 850 баш дип исәпләнә , шул исәптән 700 баш савым сыеры. Министр “Нырты” хуҗалыгында 600 башка исәпләнгән сөтчелек комплексын ассызыклап үтте. Шулай ук “Игенче” хуҗалыгында булган 450 башка исепләнгән савым сыерлары турында да искә төшерде. Саба районы сөт җитештерү буенча лидерлар бишлегендә тора һәм сөт терлекчелеген үстерүгә зур игътибар бирә», — дип билгеләп үтте Марат Җәббаров.
……
20-21нче февральдә «Казан Экспо» күргәзмә үзәгендә «ТатАгроЭкспо» агросәнәгать комплексы казанышларының 5 нче махсуслаштырылган күргәзмәсе уза. Бөтен Россиядән 200 дән артык компания авыл хуҗалыгы техникасын, нәтиҗәле терлекчелек, үсемлекчелек, азык-төлек сәнәгате өчен җиһазлар авыл хуҗалыгы продукциясен эшкәртү, саклау һәм төргәкләү техникасын күрсәтә. «Казан Экспо» күргәзмәсе кысаларында Авыл хуҗалыгы һәм азык-төлек министрлыгының киңәйтелгән коллегиясен уздыру көтелә.
Бу атнага авыл хуҗалыгы тармагына бәйле яңалыклар шулар иде. Мин сезнең киләсе атнага кадәр саубуллашам.
