Билгеле булганча, Россиядә РФ Президенты каршында Рус телен һәм илдә яшәүче башка халыкларның телләренә ярдәм күрсәтү өлкәсендә дәүләт сәясәтен гамәлгә ашыру советы төзелде. Яңа оешма дәүләт структуралары, мәдәни, фәнни һәм белем бирү учреждениеләре, рус телен һәм Россиядә яшәүче башка халыкларның телләрен саклау, үстерү һәм ярдәм итү мәсьәләләре буенча коммерцияле булмаган оешмаларның эшен координацияләү белән шөгыльләнәчәк.
Консультатив орган шулай ук Президентка рус теленә һәм Россиядә яшәүче башка халыкларның телләренә ярдәм күрсәтүнең төп юнәлешләре, рус теленең дөньядагы позицияләрен ныгыту мәсьәләләре буенча тәкъдимнәр әзерләячәк һәм россиялеләрнең әлеге телләрне куллану хокукларын тәэмин итү белән шөгыльләнәчәк. Безнең телекомпаниядә Татарстан Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәмендә әзерләнүче “Тел сагында” сәхифәсе дә иң изге максатларны күздә тота. Аның чираттагы чыгарылышында республикабызда дәүләт телләренә кагылышлы законнарга бәйле вәзгыять турында сөйләрбез.
