Алдынгы комбайнчыларга – бүләкләр. Буада дистәдән артык кыр батырын тәрбикләделәр. Алдынгылар төрле комбайннарда хезмәт куя, барысы да диярлек бүгенге көнгә ун мең тирәсе центнер ашлык суктырган. Кемнәр алар бүгенге кыр алдынгылары – хәбәрчебез танышты.
Беренче сыйныфтан бирле “кыр корабы”ннан төшмәгән, заманында “Нива”, “Дон” “Сибиряк”, “Колос”та да эшләп караган Салих Әхмәдуллин бүген унбер алдынгының берсе. Хәзер ул “Мега Клаас” йөртә. Соңгы техникасы белән эшләү дәверендә дә, барлыгы 20 елда, гомуми авырлыкта 387 мең центнер ашлык суктырган. Комбайнчының мактанырлык бүләкләре дә күп.
Биш көнгә бер тапкыр нәтиҗә ясалучы ярыш йомгаклары буенча кыр батырларына Рәхмәт хаты һәм акчалата бүләкне район башлыгы эш урыннарында тапшырды. Уңганнарның күбесе “Заря” агрофирмасында хезмәт куя. Хуҗалык басуларында бүген мул ашлык өлгергән.
Район буенча алганда, бүгенге көндә бөртекле-кузаклы культуралар биләгән мәйданнарның өчтән береннән күбрәге бушап калган. 63 мең тонна ашлык суктырылган. Район буенча уртача уңыш 32 мең центнер тәшкил итә. Еш яуган яңгырларга карамастан урып-җыю тизлеген киметмәскә тырышалар.
Шул ук вакытта районда терлек азыгы запасы әзерләү дә бара. Сенаж җитәрлек күләмдә тупланган. Якын арада силос әзерләүгә керешәләр. Көзге чәчүгә әзерлек тә бара.
Рөстәм Әхмәдуллин, Илнур Кадыйров, Татарстан яңалыклары
