Апас районы, Урта Балтай авылы фермасында терлекчелек тармагы хезмәткәрләренең районкүләм бәйгесе узды.
Авыл хуҗалыгы тармагы республикада алдынгы урыннарны били. Сөтчелекме, итчелекме – кайсы гына тармакны алып карасак та, күрсәткечләр мактауга лаек. Ә шушы көннәрдә Апас районы, Урта Балтай авылы фермасында, терлекчелек тармагы хезмәткәрләренең районкүләм бәйгесе узды. Биредә сыер савучылар үзләренең һөнәри осталыкларын күрсәтте. Барлыгы 22 хезмәткәр катнашты. Кем җиңүче дип табылды? Теманы Апастан Гөлназ Вәлиева дәвам итә.
Районда 52нче тапкыр үтүче бәйге. Сыер савучылар бу юлы Урта Балтай терлекчелек фермасында сынала. Алар үз һөнәрләре буенча осталыкларын, талантларын күрсәтә. Бәйге 3 этапны үз эченә ала. Катнашучылар эш тәҗрибәләренә таянып, теоретик яктан да белемнәрен күрсәтә. Шулай ук аларга саву аппаратларын вакытка тиз һәм дөрес итеп җыю бурычы да йөкләнә.
Роза апа Сәлахова 44 елдан бирле Урта Балтай терлекчелек фермасында сыер савучы булып хезмәт итә. Төркемендә 40 баш савым сыеры исәпләнә. Мондый бәйгедә инде ул 16нчы тапкыр катнаша. 2005 елдан бирле аның исеме районның мактау тактасында.
Югары Балтай авылыннан Илмас Сәмигуллин 8 елдан бирле сыер савучы һөнәрендә. Бүгенге көндә ул “Нур” хуҗалыгы терлекчелек фермасында эшли.
Тантаналы мизгелләр… Сыер савучылар арасында өченче урынга Борнаштан Айгөл Фәизова, икенче урынга “Нур” хуҗалыгыннан Илмас Сәмигуллин ия булды. Беренче урынга Урта Балтайдан Роза Сәлахова лаек дип табылды. Җиңүчеләргә дипломнар, кыйммәтле бүләкләр тапшырылды. Медаль тагылды.
Чара барышында авыл хуҗалыгы өлкәсендә күп еллардан бирле намуслы хезмәт куючы бер төркем хезмәткәрләргә район башлыгының рәхмәт хатлары тапшырылды.
Гөлназ Вәлиева, Татарстан яңалыклары, Апас районы
