Апас районы мәктәпләренең азык-төлек блогын капиталь төзекләндерү һәм җиһазландыру буенча республика программасы уңышлы эшләп килә. Аның нигезендә, Чирмешән мәктәбе тиздән яңа ашханәле була. Бүгенге көндә белем йортында төзекләндерү эшләре бара. Районның хәрби комиссариаты да зур үзгәрешләр кичерә.
Укучылар җәйге ялга китүгә белем йортының ашханәсендә күләмле төзекләндерү эшләре башлана. Ул мәктәпләрнең азык-төлек блогын капиталь төзекләндерү һәм җиһазландыру буенча республика программасы нигезендә бара. Биредә барлык әйбер дә өр- яңа була.
Белем йортында укучылар 2 тапкыр кайнар, сыйфатлы аш белән тәэмин ителә. Озынайтылган көн төркеменә йөрүчеләрне, балалар бакчасы нәниләрен дә ашату каралган. Шулай итеп яңа уку елында Чирмешән мәктәбе укучыларын барлык таләпләргә дә туры китереп эшләнгән заманча, матур ашханә каршы ала.
Районның хәрби комиссариаты да зур үзгәрешләр кичерә. Тыштан матур коймалар белән әйләндереп алынып, капка да куелган. Хәрби комиссариатның эчке ягында төзелеш эшләре ике өлешкә бүлеп башкарыла. Беренче өлеше инде әзер. Биредә хезмәткәрләр уңайлы шартларда эшләрен дәвам итә.
Табиблар өчен аерым бүлмәләр була. Бирегә компьютерлар куелып, алар үзара тоташа. Җиһазлар яңартыла. Мөмкинлеге чикле кешеләрнең ихтыяҗларын канәгатьләндерү максатыннан, “Уңайлы мохит” программасы нигезендә, бинага керү өчен юллар да ясала.
Алия Галиуллина, Гөлназ Вәлиева, Чулпан Сабирова, Татарстан яңалыклары, Апас районы.
