Авыл хуҗалыгында эшнең кызган чагы. Саба районы игенче-механизаторлары малларга азык запасы туплый. Бер баш шартлы терлеккә 35 центнер азык берәмлеге әзерләнергә тиеш. Бу көннәрдә терлек азыгы туплау эшләре ничек бара? Алдагы язмада.
Саба җәмгыятенең Мичән филиалында игенче-механизаторлар Кызыл Мишә авылы янындагы басуда 1 еллык үләнне чаптырып сенажга сала. 70 гектар мәйданда солы катыш борчак үстерелгән. 1 еллык үләннәр быел филиалда 150 гектар мәйданны тәшкил итә. Катнашазыкның уңыш чыгышы әйбәт, ди Тимершык бүлекчәсе агрономы.
Солылы борчакны комбайнда Азат Вәлиев урып покоска сала. Комбайн үзе көнгә 45 гектар мәйданны эшләргә сәләтле. ДЖОН ДИР тураткыч комбайннарында Рөстәм Газизҗанов белән Айрат Галимуллиннар эшли. Икесе дә Татарстанның атказанган механизаторлары.
Ә инде басулардан туратылган сенажны чокырга КАМАЗ машиналарында ташыйлар. Тоткарлыклар юк, эш шартлары да бик уңай, рәхәтләнеп эшлә генә диләр.
Сенаж чокырлары 2 мең ярым тонна сыйдырышлы, берсенә 5 мең тоннага кадәр азык сыя. Башкаларында күпъеллыклардан сенаж тутырылган. Һәркайсында катнашазык тиешле технологиягә туры китерелеп туплана. Җәй буена басуларда эш дәвам итә.
Алия Галиуллина, Райлә Галәвина, Ирек Солтанов, Татарстан яңалыклары, Саба районы.
