Уңышны ике-өчләтә арттырырга. Кыят тәҗрибә-җитештерү хуҗалыгында моңа җирләрне сугару хисабына ирешергә планлаштыра. Аграр өлкәдә яңалыкларны гамәлгә ашыра баручы хуҗалыкта бүген “Татмелиорация” оешмасы проекты буенча сугару агрегаты җиһазлана. Кыятлылар системаны ничек кулланырга уйлыйлар? Алдагы язмада.
Кыяттагы сугару системасын сигез түгәрәк белән су сиптерүче машинасы һәм биш километр торба тәшкил итәчәк. Бүгенге көндә аларны җыю белән өч бригада шөгыльләнә. Бересе торбалар суза, икесе сугару системаларын монтажлый. Cервис инженеры Владислав Переверзев сугару машинасын җыю белән мәшгуль.
Дүрт йөз гектарда үсемлекләрне сугарырга сәләтле системага нибары бер кеше идарә итәчәк. Махсус программа буенча һәм пульт аша. Әмма агрегатларның иң зур өстенлеге теләсә кайсы культураның уңдырышлылыгын берничә тапкыр арттыруда. “Кыят” хуҗалыгында әлегә орлыкка люцернаны су сиптереп үстермәкчеләр.
Сүз уңаеннан, Кыят тәҗрибә-җитештерү хуҗалыгында кырларны сугару системасы совет чорында да булган. Ул чакта аның су сиптерү мәйданы да зуррак булган.
Ә хәзер хуҗалыкта яңа системаны эштә сынарга җыеналар. Люцернаны бодайдан бушаган мәйданда августның беренче декадасында чәчеп, су сибеп үстерәчәкләр. Ә нәтиҗәне киләсе ел күрсәтәчәк.
Рөстәм Әхмәдуллин, Илнур Кадыйров, Татарстан яңалыклары.
