Шушы көннәрдә Апас районында уракка әзерләнү, игенчеләрне барлау һәм кыр корабларының төзеклеген билгеләү уңаеннан, комбайннар парады үтте. Ул республиканың авыл хуҗалыгы һәм азык-төлек министрлыгы катнашында оештырылды. Быел район буенча 37 мең 555 гектар мәйданда бөртеклеләрне җыеп алу бурычы тора. Урып-җыю эшләрендә барлыгы 90 берәмлек комбайн катнашты.
Комбайннар парады… Ул елдагыча Дәүләки авылы янәшәсендәге кырда оештырыла. Биредә икмәк язмышын кайгыртучылар, игенчеләр, район башлыгы, авыл хуҗалыгы өлкәсе җитәкчеләре, белгечләре белән очраша.
Биредә урып-җыю эшләрендә катнашачак техникалар бер сызыкка тезелгән. Алар тиешенчә җиһазландырылган. Комбайннарга контроль суктыру да үткәреп каралды. Урак чорында игеннәрнең бөртеге дә әрәм булмаска тиеш.
Барлык комбайннар да хуҗалы. Механизаторлар белән тәэмин ителгән. Аларның кулында бүген уңыш язмышы.
Айрат әфәнде Исмәгыйлев Танай-Турай авылыннан. Комбайнга 1975нче елда утыра. Шуннан бирле икмәк язмышы өчен көрәшә. Бүгенге көндә инде лаеклы ялда. Шулай булса да һөнәрен ташламый, тугры булып кала.
Быелгы уңыш әйбәт булыр. Иң мөһиме: аны югалтуларсыз, үз вакытында җыеп алырга язсын.
Гульназ Валиева, Чулпан Сабирова, Татарстан яңалыклары, Апас районы.
