Балтач районы Бөрбаш авылында XVII Россиякүләм мөселман балалар Сабан туе узды. Милли-тәрбияви бәйрәмнән Мөршидә Җиһан репортажы. Мәрхәмәт, игелек дип әйтү юкка түгел чөнки әлеге чара тулысынча күңел кушканга, үсеп килүче киләчәк буынны кайгыртуга үз өлешен кертергә теләүчеләр нияте һәм матди ярдәме белән оештырыла.
Балалар бәйрәме коръән һәм догалар уку, мөнәҗәт әйтү, җыр-шигырьләр белән үрелеп бара. Әмма иң әүвәл авыл тормышында кайнап яшәүче, шулай ук күп балалы гаиләләр мәйдан уртасында хөрмәтләнә.
Мөселман балалар сабан туена Татарстан районнарыннан тыш, башка өлкәләрдән һәм ызандаш республикалардан да гаиләләр килә.
Балалар мөселман сабан туен –әдәп-әхлак тәрбиясенең тәҗрибә мәйданы буларак кабул итеп, киләчәктә аның тәэсирендә мәктәпләрдә дәреслекләр әзерләү белән шөгыльләнүчеләргә тап булдык. Чаллыдан Гыйльмановлар гаиләсе фәнни хезмәтнең бер өлешен әзерләгән.
Мәйдан уртасында әти-әнисенә булган хөрмәтне күреп үскән бала, әлбәттә инде алардан үрнәк ала.
Фирдәвеснең әтисенә , шулай ук тагын бер гаиләгә гомрә хаҗына юллама тапшырылды.
Чарага җыелган халык өйлә намазын күркәм гадәт буенча мәйдан уртасында укыды.
Бөрбаштагы бәйрәмнең Россиядә Гаилә елы һәм Татарстан мөселманнары Диния нәзарәте тарафыннан игълан ителгән Гаилә һәм хәләл яшәү рәвеше елында узуы да символик мәгънәгә ия дип белдерде Татарстан мөфтие исеменннән котлап чыгыш ясаган Равил хәзрәт Зөфәров.
Балалар махсус өйрәнеп, корьән аятьләре укырга чират торган мөселманча Сабан туе бу.
Биредә ялгыз буталып йөрүчеләр юк диярлек. Барысы да туган-тумача белән, хәтта 3 буын белән гаилә белән чыгучылар да бар.
Беренчесе, соңгысы булмас, бер килгәннән соң кабат киләсе килә. Кариледән килгән –аш –су осталары да кунакларны капка төбеннәнән үк сыйлый башлый. Мич янында кайнашкан Марат Нигъмәтҗановның кулы- кулга йокмый, аңа Шаһидә белән Лилия дә булыша.
Мәйдан уртасы гөж килә . Бер якта балалар тизлеккә чабып җитезлектә сынаса, икенче якта җепкә бәйләнәгән бүләкләр дә кими. Кыскасы Сабан туе мәйданының хуҗалары — балалар. Шунысы белән дә бик кадерле әлеге сабан туе дип белдерде кунак булып кайткан дәүләт вәкилләре.
Горурланырлык бәйрәм, әле аның табигать кочагына урнашкан урыны да бик күркәм. Шәһәр балалары өчен әнә шушы каз-үрдәкләрне күрү дә, сабан туе мәйданы тирәчендәге чишмәләр, аккошлар өчен ясалган күллекләр үзе бер могҗиза.
Татарстанның баш казые Җәлил хәзрәт Фазлыев башлангычында оештырылган балалр сабан туен киләсе елда яңа статус алуы да ихтимал .
Һәр Сабан туеның бизәге, әлбәттә – милли көрәш. Елдагыча 5 авырлык категориясендә балалар һәм яшүсмерләр бил алышты.
Мөршидә Җиһан, Илдар Галәветдинов. Татарстан яңалыклары өчен махсус Балтач районыннан.
