Юбиляр балалары, оныклары, оныкчыклары түгәрәгендә күпсанлы котлаулар кабул итте. Хөршитбану әби әле дә газеталар укый, намазын калдырмый һәм Ак барс хоккей командасы фанаты да әле ул. Йөзьяшәр әбинең тормышы белән якынрак хәбәрчебез таныштыра.
Хөршитбану Гайнулловна тумышы белән күрше Кырык Садак авылыннан. 1949 елда Янтуган авылыннан фронтовик егеткә кияүгә чыга. Гомере буена колхозда эшли. Һәр җирдә үрнәк була. Аның җаваплылыгына, кырыс тәртиплелегенә ишарәләп заманында хезмәттәшләре, хөрмәт итеп, колхоз анасы дип йөрткәннәр үзен.
Йөзьяшәр әби бүген балалары тәрбиясендә яши. Озак еллар авылда ак әби була, мәетләр юа. Биш вакыт намазын калдырмый. Ходуноклар ярдәмендә хәрәкәтләнә. Телевизордан хоккей күрсәтсәләр, экран каршыннан китми дә. Ак Барс хоккей командасы өчен җан ата, отуларын теләп догалар укый.
Хөршитбану әбигә Россия һәм Татарстан президентлары исеменнән котлау открыткасын Буа районы башлыгы Ранис Камәртдинов тапшырды.
Бу дөньяга сигез бала бүләк иткән, 11 оныгы, 12 оныкчыгы булган әби авылның иң өлкән һәм хөрмәтле кешесе. Кунакларны ул 105 яшьлек юбилейга да килерсез, дип озатып калды.
Рөстәм Әхмәдуллин, Илнур Кадыйров, Татарстан яңалыклары
