Мәктәпләрдә укулар тәмамланды, әмма мәктәп ишегаллары тынып калмады. Биредә балалар өчен җәйге лагерьлар эшли.
Шундыйларның берсе Буа районының Роальд Сәгъдиев исемендәге мәктәп базасында эшли. Бүгенге көндә лагерьда туксаннан артык укучы вакытын файдалы үткәрә. Балаларның көндәлек режимы белән Буадагы хәбәрчебез Рөстәм Әхмәдуллин танышты.
Күңелле музыка астында иртәнге зарядка. Роальд Сәгъдиев исемендәге мәктәп базасындагы “Кояшкай” лагерена йөрүчеләрнең һәр иртәсе шундый процедурадан башлана. Аннары тәрбиячеләр малай-кызларның ялын ничек тә кызыклырак һәм файдалырак итү өстендә баш вата.
Студент Диана Әхмәтшинага алар белән эшләү бик ошый.
Ә уеннардан һәм спорт күнегүләреннән соң балаларны ашханәдә тәмле ашлар көтә. Ашчылар аларны баланслы һәм файдалы итү өчен бар тырышлыкларын куялар. Балалар рәхмәт әйтеп, барысын да ашап бетерәләр.
“Кояшкай» мәктәп яны лагеренда барлыгы 97 бала ял итә. Алар дүрт отрядка бүленгән. Лагерь начальнигы Ольга Толмачева сүзләренә караганда, биредә актив ял өчен барысы да бар. Һәр көн план буенча бара
Өч атна дәвамында балалар шул рәвешле сәламәтлекләрен ныгыталар, шулай ук олылар күзәтүе астында булалар.
Рөстәм Әхмәдуллин, Илнур Кадыйров, Татарстан яңалыклары
