Буа районында Сабан туен зурлап билгеләп үттеләр. Башта Яңа Тинчәле авылында, аннары шәһәр үзәгендә. Бәйрәмгә Татарстаннан гына түгел, Россиянең башка төбәкләреннән дә меңләгән кунак җыелды. Халык рәхәтләнеп күңел ачты. Сабантуйның ничек узуы турында киләсе сюжетта.
Яңа Тинчәле авылдагы һәр бәйрәм аеруча күләмле матур үтә. Сабан туена да барысы җыелган – олысы да, кечесе дә. 600 кешелек авылның бәйрәмен яңгыр да бозмады. Юешләнмәс өчен халык мәдәният йорты һәм мәктәпкә керергә мәҗбүр булды, аңа карап ярышлар туктатылмады.
Төп тантана шәһәрнең үзәк мәйданында үтте. Сәхнәдә — сабантуйның сокландыргыч тарихы. Ат чабышы, йөгерү, көрәш, аркан тартышу. Көч һәм җитезлек күрсәтергә теләүчеләр күп биредә. Сабан туен уеннарсыз да күз алдына китереп булмый: кашыкка йомырка салып йөгерү дисеңме, тулы чиләкле көянтә күтәреп чабу дисеңме, барсы да бар. Бәйрәм ике иң көчле батырның көрәше белән тәмамланды. Җиңүчегә — тәкә.
Миләүшә Мусина, Ралина Абрамова, Владимир Юрков. Татарстан яңалыклары.
