Бу көннәрдә Мәскәү мәдәният үзәгендә «Апуш» татар балалар театр студиясе шәкертләре, “Әкият китабы дип исемләнгән премера тәкъдим итте.Әкияти куелышта студиягә йөрүче 40 бала да катнаша. Спектакль драматург, Татарстанның атказанган артисты Шамил Фәрхетдинов пьесасы буенча чын әкият кануннарына буйсынып сәхнәләштерелгән. Әкият китабын Миләүшә Мусина да күреп кайтты.
Өч ай тыгыз эш һәм иртәле-кичле репетицияләр бетте. Ниһаять Апушның Мәскәү студиясе үзләренең беренче иҗат җимешләрен Казан тамашачысына күрсәтә. Бу нәни артистлар өчен дә, остазлары өчен дә бик дулкынландыргыч.
“Әкият китабы” спектакленә әзерлек февраль аенда башланган. Балалар репетицияләрнең күп булуына карамастан бик яратып ашкынып йөри. Үзара алар биредә татарча аралаша.
Кәләпүш кигән зирәк егет Гайрәт, нәфесле надан хан, тылсымлы әкият дөньясы. “Әкият китабы” әсәрен драматург Шамил Фәрхетдинов үзенең кечкенә кызына багышлап язган.
Спектакльнең режиссерыЗөлфәт Закиров өчен дә бу — гаилә бәйрәме. Беренче тапкыр бу әсәрне ул 9 ел элек Тинчурин театрында куйган булган инде. “Әкият китабы” әсәренә мәхәббәтен ул шуннан бирле саклап килгән.
Балачакның иң матур мизгелләре танылган артистлар кул астында уза. Бу сәләтле балалар һичшиксез киләчәктә зур үрләр яулар.
Миләүшә Мусина, Владимир Юрков, Татарстан яңалыклары.
