Казанның Идел буе дәүләт физик культура, спорт һәм туризм университетында Татар теле һәм әдәбиятыннан XI Халыкара олимпиадага йомгак ясалды, җиңүче укучыларны бүләкләү тантанасы булып узды. Тулырак безнең хәбәрчебез Фәннур Хәсәнов видеоязмасында.
Олимпиаданың дистанцион этабында Төркия, Кыргызстан, Үзбәкстан, Казахстан, Азәрбайҗан республикаларыннан, Татарстан һәм Россия Федерациясе төбәкләреннән 12 меңнән артык укучы һәм студент катнашты.
Җиңүчеләрне Бөтендөнья татар конгрессы Башкарма комитеты җитәкчесе Данис Шакиров һәм Татарстан Республикасының мәгариф һәм фән министры Илсур Һадиуллин котлады.
Олимпиада өч турдан: татар теле, әдәбияты, татар халкы һәм Татарстан тарихы буенча язма рәвештә һәм телдән биремнәр үтәү. Өч турның нәтиҗәләре нигезендә 3 гран-при иясе, 20 җиңүче һәм 77 призер билгеләнде. Укучыларның эшләрен 30 галимнән торган жюри бәяләде.
Олимпиадада катнашучыларны туган тел мөгаллимнәре озата килде.Олимпиадада катнашучыларны һәм Гран-при ияләрен Татарстан Дәүләт Советы Рәисе урынбасары Марат Әхмәтов котлады.
Гран-при Казанның «СОлНЦе» урта гомуми белем бирү мәктәп-интернаты укучысы Рәйсә Абдуллина, Башкортстан республикасынның Уфа шәһәре 65 енче санлы татар гимназиясе укучысы Илдан Кәлимуллин һәм Кыргызстанда Кыргыз-Россия Славян университетында белем алучы 2 курс студенты Зөлфия Шәрәфетдиновага бирелде.
Бәйге 3 көн дәвам итте. Анда катнашучылар ял вакытларында башкалабызның истәлекле урыннарында булды, театрларда спектакльләр карады, иҗат әһелләре белән очрашты.
Фәннур Хәсәнов, Искәндәр Төмәнев Татарстан яңалыклары.
