Пирамида концертлар залында бәйрәм рухы хөкем сөрә. Килгән кунакларны Актаныштан килгән инструменталь ансамбле каршы алды. Тамашачылар концерт алдыннан үзләре дә җыр-моң тәэсиренә бирелде.
Бирегә 4 нче яңа татар җыры бәйгесе җиңүчеләрен ишетергә дип килгән тамашачылар җыелган. Әлеге гала-концертка кемдер беренче тапкыр гына килгән булса, 4 ел дәвамында “ Яңа татар җыры”ның тугрыклы тамашачылары да барлыкка килгән. Шундыйларның берсе Резидә Дәүләтшина.
Быелгы концертта конкурста җиңүче дип табылган өр-яңа җырлар белән беррәттән өч ел дәверендә танылырга өлгергән җырлар да яңгырады, аларны сәхнә йолдызлары башкарды. Быел жюри әгъзалары 170 җыр арасыннан 15 җиңүчене сайлап алган.
Җиңүчеләр 50 меңнән алып 200 меңгә кадәр акчалата бүләккә ия булдылар. Быел беренче урынга Миләүшә Хәйретдинованың Булат Ибраhимов сүзләренә язылган “Шагыйрь” җыры лаек дип табылган. Аны Татарстанның атказанган артисты Руслан Сәйфетдинов башкарды. Әлеге җыр Яңа татар җыры бәйгесенең жюри рәисе булып торган Татарстанның халык шагыйре Разил Вәлиевнең якты истәлегенә багышланды.
