Балкыш фестивале оешканнан бирле анда чыгыш ясаучылар саны 100 меңнән артып киткән. Быел фестивал сигезенче тапкыр уза, һәм ике елга бер үткәрелә , шуңа ул быел Бөек Җиңүнең 80 еллыгына багышлана. Яшьләре өлкән булса да күңелләре яшь сәхнә ветераннары белән Мөршидә Җиһан аралашып кайтты.
Балкыш хәрәкәтенә бер кушылсаң аерылып була торган түгел ди ел саен катнашучылар. Өстәвенә, нигезләмәдә чикләүләр юк диярлек , бер генә шарт, лаеклы ялда булу.
Яшьләрне дә көнләштереп терекөмеш кебек чәчрәп торган Венера әбигә 11 майда 87 яшь тула.
Сәйдәш мәдәни үзәгендә чыгыш ясаучылар беренче иләктән иләнгән , хәзер икенче баскыч аша узу өчен сәхнәдә ут уйната.
Балкышның төп артислары узган гасыр чыныктырган буын вәкилләре. Иң өлкәненә 98 яшь дип белдерде фестивальне оештыручыларның берсе Хәбир Иштирәков.
Дилара Галиева яшьтән җырларга ярата. Казанның мәдәният йорты каршында эшләгән түгәрәкләргә йөргән. Әмма конкурс сәхнәсе аеруча таләпчән.
Җырчыга баянчы буларак уйнаган Васил Гарифуллинга жюри бәя бирми югыйсә шәп сыздыра. Гомумән музыкантлар аерым бәяләнми. Димәк, икенче елга Казан федераль университеты данын яклап аерым катнашырга кирәк.
Яшьлеген озынайтып чыгыш ясаучылар арасында лириклар гына түгел физиклар да бар.
Башкарылган җырларның күбесе патриотик юнәлештә. Аерым җыр итеп тә попури буларак та тәкъдим ителде.
Балкыш фестивалендә быел театральләштерелгән тамаша юнәлешендәге яңа номинация кертелде. Ул һәр халыкның фольклор хәзинәсен барлауны күздә тота.
Араларында халык артисты булырдайлары да бар, вакытында һөнәр итеп иҗат юлын сайламау комачаулаган ди бәя бирүчеләр.
Елына 23 мең өлкән кешенең сәләтен күрсәтергә мөмкинлек биргән гаҗәеп фестивальТатарстан Рәисе Рөстәм Миңнеханов, район хакимиятләре, министрлыклар һәм ведомстволар ярдәме белән оештырыла. Күңелләре белән яшь булучыларны бүләкләү тантанасы 25 апрельдә Филармония концертлар залында уза. Иң яхшы номерлардан төзелгән гала-концерт та быел берничә булуы ихтимал, чөнки картаерга ашыкмаган сәләтле үзешчәннәр фестивальдә елдан ел күбрәк катнаша.
Мөршидә Җиһан, Ленар Хәбибуллин. Татарстан яңалыклары
