Кояш баеды. Ураза тотучылар өчен авыз ачар вакыт җитте. 13 сәгатькә якын вакыт дәвамында мөселманнар судан һәм ризыктан тыелып торалар. Ифтар башланганчы дога кылып намаз укырга кирәк. Уразаның мәгънәсе ашау- эчүдән тыелуда гына түгел. Асылы рухи чистарынуда.
Республика ифтары Казан Экспода үтә. Быел халыкны алдан ук килергә куштылар — бу куркынычсызлык чаралары белән бәйле. Кунаклар монда көндезге сәгать өчтә килә башладылар. Бу вакытта фойеда хәләл-ярминкә оештырылган иде.
Республика ифтарының мөһим өлеше-хәйриячелек. Мөселманнар Рамазанга изге эшләрнең сәвабы 700 тапкыр арта дип ышана. Шуңа да алар бу изге айда күберәк игелекле эшләр башкарып калырга тырыша.
Быел Ураза апрельнең беренче ункөнлегендә тәмамланачак. Ураза гаете бәйрәме 10 апрельдә көнне узачак. Республикада бу көн ял көне. Ир-атлар бәйрәм иртәсен, мәчетләрдә дога белән каршы алачак. Бу көнне — бай өстәлләр әзерләү, кунакларны сыйлау, шатлану һәм күңел ачу гадәти хәл. Туганнар бер берсенә кунакка йөри, бүләкләр бирешә, ярлыларга ярдәм итәргә тырышалар.
Фәннур Хәсәнов, Әмир Мамин. Татарстан яңалыклары.
