Татарстан Республикасы Мәдәният министрлыгы тарафыннан гамәлгә куелган “Тантана” театр премиясе 14нче тапкыр оештырылды. Җиңүчеләрне бүләкләү тантанасы узды.
Ел саен халыкара театр көнендә оештырылучы Тантана премиясе Театр сәнгате өлкәсендәге иҗади казанышлар өчен бирелә. Бу чара театр әһелләре өчен зур бәйрәмгә әверелә. Театрлар бүген үсештә, ә «Тантана» премиясе аларны тагын да канатландырыручы чара булып тора ди Буа дәүләт драма театры җитәкчесе Раил Садриев.
«Тантана» премиясе республика театрларын бердәм көндәшлек кырына берләштерү өчен уйланды дип белдерә оештыручылар.
Быел премиянең оештыру комитеты тарафыннан 60 гариза каралган, катнашучылар 17 номинация буенча бүләкләнде. Алар арасында 7нче тапкыр премия алучылары да бар. Кемдер премиягә берничә тапкыр ия булса, беренче тапкыр «Дебют» номинациясендә җиңүчеләр дә бар.
Буа драма театрын иң күп гастрольләргә йөрүче, иң күп бәйгеләрдә катнашучы театр буларак беләбез. Махсус бүләк тә аларга шул номинациядә бирелде. Якташларын якташлар котлады. Төгәлрәге Буа якташлык җәмгыяте вәкилләре Раил белән Фәрит Садриевларга чапан бүләк итте.
Театрлар hәм артистлар төрле номинацияләрдә җиңү яулады. Аларның һәрберсе үзенчәлекле бәһагә ия, әмма иң зур бәя — тамашачы алкышлары.
Алия Галиуллина, Илдар Галәветдинов, Татарстан яңалыклары, Буа.
