Ул Казанга керү юлында урнашкан, юлчылар, туристлар өчен аерым уңайлыклар тудыра. Ачылу тантанасында Республика Рәисе Рөстәм Миңнеханов һәм Татарстан мөфтие катнашты.
Азан тавышына халык җыела. Яңа Тура авылында зур вакыйга — мәчет ачылшы. Аны төзү турындагы карар мөселман мәхәлләсе төзелгәннән соң 2013нче елда ук кабул ителгән иде. 20нче елда беренче ташы салына.
Өч катлы мәчет 250 кешегә исәпләнгән. Инде беренче ифтар да оештырылды. Интерьер композициясенең үзәгендә бизәлгән, яктыртылган Михраб. Заманча яктырткычлар һәм үзәктәге бизәкле келәм игътибарны җәлеп итә. Төзелеш эшләре хәйриячеләр көче һәм Татарстан Рәисе каршындагы Мәдәниятне үстерүгә ярдәм фонды белән алып барылды. Ачылу тантанасында Рөстәм Миңнеханов һәм Татарстан мөфтие Камил хәзрәт Сәмигуллин катнашты. Мәхәллә халкы белән бергә алар беренче намазны укыды.
Мәчет гомуми мәйданы өч гектардан торган Ислам үзәгенең башлангычы булып тора. Мәдрәсә, никах-үзәге һәм балалар бакчасы барлыкка килә. Алга таба мәчет территориясен һәм якындагы күл янын төзекләндерү эшләре каралган.
Алия Галиуллина, Алмаз Хәкимов, Ренат Сәхипгәрәев, Татарстан яңалыклары, Яшел Үзән районы.
