Зәй районы, Шыкмай авылы халкы махсус хәрби операциягә гуманитар ярдәм җыюда зур тырышлык күрсәтә. Кичләрен мәдәният йортына җыелып авыл халкы окоп шәмнәре ясый, өйләрендә хәрбиләр өчен эчке киемнәр тегүчеләре дә бар. Ә изге күңелле Назыйм Минһаҗев шушы эшләрне башлап йөрүче. Тагын әле ул хәрбиләр өчен дисбеләр дә ясый. Бер партия әзерләп җибәргән инде. Эш барышы белән безнең төшерү төркеме дә танышып кайтты.
Һәр иртәдә, кулына эш коралын алып, Назыйм Минһаҗев игелекле гамәлне башкара. Изге күңелле абзый хәрбиләргә дисбеләр ясый.
Гади сәйләннән түгел, табигый материаллар: урман чикләвеге, хөрмә җимеше төшләре, мәрьям ана орлыкларыннан тезә. Соңгыларын исә табуы кыен, аларны Казан якларыннан махсус кайтарткан.
Дисбеләр тезү буенча Назыйм абыйның тәҗрибәсе бар. Ясаганнарын бүләк итә, Коръән ашларында ошатып калалар. 108 тәсбих ясап хәрбиләргә җибәргән инде, хәзер тагын 100не тезгән. Материал булса, ясаудан туктарга уйламыйм әле, ди. Ә сугышчылардан килгән рәхмәт сүзләре тагын да рухланып эшләргә көч бирә.
Шыкмай кечкенә булса да, авылда хәрбиләргә бик зур ярдәм җыела. Окоп шәмнәре ясыйлар, эчке киемнәр тегәләр, башка кирәк-ярагын туплыйлар. Шушы көннәрдә генә тагын 200 мең сум акча җыеп тапшырырга да өлгергәннәр.
Әдилә Борһанова, Юлия Казамарова, Максим Майоров, Татарстан яңалыклары, Зәй районы.
