Бу көннәрдә Cаба районының төрле авыл җирлекләрендә берләшкән волонтерлар төркемнәре махсус хәрби операциядәге катнашучылар соравы буенча маскировка челтәре үрү белән мәшгуль. Якын арада чираттагы гуманитар ярдәм белән аларны да өлгертеп озатырга кирәк. Ә бу шактый күләмле эш. Челтәр үргәндә кемнең дә ярдәме артык түгел, — диләр Шәмәрдән авылы активст ханымнары. Алдагы хәбәребез шул хакта.
Шулай күмәк җыелганда сөйләшер сүзләре ут эчендәге балалары, ирләре турында. Хәрби операциядә булганнарга ярдәмнең кайсы да артык түгел. Соңгы вакытта солдатларның үзләреннән маскировка челтәрләре кирәклеге хакында үтенеч килгән.
Гүзәл ханым Шәмәрдән лицеенда башлангыч сыйныф укытучысы. Ике бала әнисенең үз ире дә махсус хәрби операциядә катнаша. Элемтәдә торалар. Ул бер шалтыратуында үзләренә маскировка челтәренең бүгенге көндә бик кирәкле саклану чарасы булуы турында әйтә.
Рәмзия ханымның улы Чаллы шәһәреннән мобилизацияләнә. Быелның гыйнвар башында хәрби отпускага кайтып китә. Солдат анасының күңеле баласы өчен ут йотып тора. Шуңа ул бирегә килеп, үз ишләре белән аралашып, җанына тынычлык ала. Гомумән Шәмәрдән җирлегеннән 50 дән артык ир-егет бүгенге көндә хәрби операциядә катнаша. Авылда аларның әниләре, хатыннары берләшеп телефонда “Үзебезнекеләрне ташламыйбыз ” дип аталган төркем дә булдырганнар.
Икесе әзер, өченчесе булып килә. Солдатлар 5не сораган булганнар. 5кә5 размерлы бу япмалар, күләме буенча шактый кулны тоталар.
Рәмзия ханымның улы да, кияве дә беренче көннән махсус хәрби операциядә. Әлеге челтәрләр хәрбиләрне, коралларны, хәрби техниканы һәм башка мөһим объектларны маскировкалау өчен кулланыла. Һәрбер ятьмә кемнеңдер гомерен саклап калу һәм дошманнан яшерү мөмкинлеге. Чираттагы гуманитар ярдәм районнан Херсон якларына февраль аеның соңгы көннәренә планлаштырыла.
Динә Нәҗметдинова, Райлә Галәвина, Ирек Солтанов, Татарстан яңалыклары, Саба районы.
