Казанда узучы «Киләчәк уеннары»нда медицина оешмаларыннан 500дән артык белгеч җәлеп ителгән. Бу хакта ТР Сәламәтлек саклау министрлыгының матбугат хезмәтендә хәбәр иттеләр.
«Уеннарга җәлеп ителгән медицина персоналының гомуми саны 583 кеше тәшкил итә, алар ике сменада эшләячәк», — дип искәрттеләр ведомствода.
Билгеләп үтелгәнчә, уеннар үткәрелә торган объектларда 20 медицина пункты, 40 мобиль медицина бригадасы һәм 25 ашыгыч медицина ярдәме бригадасы эшләячәк.
Казанда «Киләчәк уеннары»нда катнашучылар өчен спорт поликлиникасы эшли башлады. Ул 21нче шәһәр поликлиникасы базасында оештырылган.
Казанда 21 февральдән 3 мартка кадәр «Киләчәк уеннары» үтә. Бу — классик спорт, киберспорт һәм технологияләрне берләштергән инновацион технологик дисциплиналар буенча халыкара турнир.
