Күптән түгел генә,«Сәйдәш» мәдәни үзәгендә Татарстан Республикасы мәдәният министрлыгы, Яков Емельянов исемендәге мәдәни үзәк, Керәшеннәрнең «Бәрмәнчек» дәүләт фольклор ансамбле, Татарстан республикасы керәшеннәренең иҗтимагый оешмасы тарафыннан оештырылган 13 РЕСПУБЛИКАКҮЛӘМ «ТУЫМ ҖОНДОЗЫ» КОНКУРС-ФЕСТИВАЛЕНЕҢ Гала-концерты булып узды. Тамашаны үз хәбәрчебез Фәннур Хәсәнов та күреп кайтты.
«Туым Жондозы» – керәшен җыруларын яшь башкаручылар конкурс-фестивале 2008 елда Казанда Татарстан Республикасы керәшеннәренең иҗтимагый оешмасы тарафыннан, керәшен сәнгатен үстерү бурычы белән, шәһәр фестивале буларак оештырыла. Әлеге конкурс-фестивал керәшеннәрнең этник мәдәниятен үстерү һәм саклауны, халык җырын, инструменталь сәнгать үрнәкләрен башкаручы яшьләрне ачыклауны һәм аларга киләчәктә ярдәм итүне максат итеп куя.
Ел саен конкурс-фестивальдә солист-вокалистлар һәм фольклор ансамбльләре җиде номинациядә көч сынаша. Конкурс-фестиваль елдан-ел киңәя бара. Фестивальдә катнашучылар саны да елдан-ел арта.
Сайлап алу турлары биш зонада: Чистай, Кукмара, Әлмәт, Кайбыч районнарында һәм Казан шәһәрендә узды. Фестивальдә бөтен республика буенча 1000 нән артык талантлы яшьләр катнашты.
“Туым Жондозы” конкурсы катнашучы яшьләргә иҗат өлкәсендә зур мөмкинлекләр ача. Катнашучылар үзләренең иҗатларын югарырак дәрәҗәдә дәвам итәләр: илнең иң яхшы уку йортларында белем алалар, керәшеннәрнең «Бәрмәнчек» дәүләт фольклор ансамбленә эшкә урнашалар, башка танылган ансамбльләрдә чыгыш ясыйлар һәм төбәкара, бөтенроссия, халыкара конкурсларда һәм фестивальләрдә керәшеннәрнең мәдәниятен лаеклы тәкъдим итәләр.
Керәшен җыруларын башкаручы солистлар арасында Гран-При бүләгенә Кукмара районыннан Зоя Николаева ия булды, ә фольклор коллективлары арасында Кайбыч районыннан ”Инешкәй” фольклор ансамбле лаек дип табылды.
Фәннур Хәсәнов, Ленар Хәбибуллин, Татарстан яңалыклары.
