Хәерле көн, мөхтәрәм телевизор караучылар! Торам-торам да аптыраганнан хатынның колагын борам, дигән ди бер татар агае. “Шәhри Казан” газетасы журналисты да үз укучыларының игътибарын ныграк җәлеп итәм диптер инде, иркенәеп китеп, кабер казучыдан интервью алган. Шәhәрдә кабер казучы эшенең акчалы икәнен ишетә белә идек белүлекккә. Ләкин журналист бу кадәресе белән генә чикләнеп калмыйча, төнлә зиратта калып эшләргә курыкмыйсызмы, өрәкләр күренми кебегрәк сорауларга ачыклык кертүне кирәк тапкан.
Кызык эзләгән, кыскасы. Ә бит авыл җирендә каберне гомер-гомергә авыл ир-атлары шулай тиеш өчен башкарды hәм башкара да. Ләкин авыл зиратына авылныкы булмаган кешеләрне кайтарып куйганда нинди проблемалар килеп чыкканлыгы, аны урыннарда ничек хәл итүләре турындагы язма газета укучыларга күпкә якынрак булыр иде дә бит… Аның өчен эзләнергә, селкенергә кирәк шул.
Яңа елга кергәч, республика министрлыклары hәм ведомстволары үткән елгы эшләренә нәтиҗә ясарга дип коллегияләр үткәрә. Бу арада булып үткән коллегияләрдә яңгыраган проблемалар да журналистлар өчен азык булды. Мәгариф hәм фән министрлыгының шундый чарасында Татарстан Рәисе Рөстәм Миңнеханов:”Беләм, хезмәтегез җиңел түгел, бик авыр. Укытучысыз беребез дә кеше була алмый” дип ярып салган. Алай гына да түгел, Казансу елгасының иң матур җирендә быел укытучыга атап hәйкәл куеласы, музей ачыласы hәм махсус бакча да барлыкка киләсе икән. Бирсен Ходай-бәлки шул рәвешле иң сабыр, иң гүзәл hөнәр ияләренең кадерләре арта башлар.
Убыр китте- урыны калды. Европа товарлары илдән киткәннән соң, бушап калган кибет киштәләрен Кытай, Төркия һәм Белоруссиядә җитештерелгән көнкүреш техникасы яулап алды, ди белгечләр. Ят исемле кер юу машинасы, суыткыч сатып алу куркыныч түгелме? Кытай чәйнегенең сыйфатына күрә бәясе туры киләме? «Ватаным Татарстан» газетасы хәбәрчесе әнә шул сорауларга җавап эзләгән.
Хәер, шул ук белгечләр моңарчы да Европа таварларының Кытайда эшләнгәнен яшермиләр иде.
Фигуралы шуу остасы Камилә Вәлива тирәсендәге шау-шу тагын өскә калкып чыкты- Халыкара спорт арбитраж суды аның соңгы елларда яуланган барлык медальләреннән hәм бирелгән премияләреннән мәхрүм итү, Камиләне дүрт елга спорттан читләштерү турында карар чыгарды. “Ватаным Татарстан” газетасы бу карар артында нәрсә ятканын ачыкларга алынган.
Нәрсә дисең инде- спортка сәясәт килеп тыгылса, яхшлык көтмә- теләсә кемнең язмышын җимерә ул. Камиләбезгә Аллах сабырлык hәм ихтыяр көче бирсен дип кенә телисе кала.
Болгавыр заманның көтелгән hәм көтелмәгән сынауларыннан өстен чыгу өчен Камиләгә генә түгел, hәркайсыбызга да тән hәм җан саулыгы теләп, бүгенгә сезнең белән саубуллашам. Исәнлектә күрешик!
