Республика күләмендә “Тату сыйныф серләре” бәйгесе ел да оештырылып килә. Әлеге бәйге мәктәп укучылары һәм ата-аналар катнашында уза. Инде барлык раойоннарда бәйгенең муниципал этабы үтте. Саба районында да 5 мәктәп укучылары һәм ата-аналар комитеты иң тату сыйныф исеме өчен көрәште. Кемнәр җиңүче дип табылды? Бу турыда алдагы язмада.
Саба урта мәктәбе укучылар, әти-әниләр шау — шуына күмелгән. Мәктәп һәм гаилә бердәмлеге – тәрбиянең төп асылы, дигәндә “Тату сыйныф серләре” бәйгесе ачык мисал булып тора да инде. Уку елы белән бергә, сентябрь аеннан старт алган бу зур чара әле бүгенгәчә дәвам итә. Башта ул район мәктәпләрендә үз сыйныфлары арасында узды. Аннан берәр сыйныф сайлап алынып зона турында катнашты. Нәтиҗәдә 5 зонадан 5 сыйныф финалга чыга. Район өчен муниципаль этап финалы шулай ук җаваплы булып тора.
Биредә Саба гимназиясе, Шәмәрдән лицее, Олы Кибәче, Юлбат, Шекше мәктәпләренең әти-әниләр комитетлары чыгыш ясый. Аларны исә мәгариф идарәсе, районның башка тармак хезмәткәрләрен туплаган жюри комиссиясе бәяли. Беренче бирем, “Безнең күңелле тату сыйныф ” визит карточкасы.
Сыйныфлар 5 минут эчендә үзләренең уку, дуслык, бердәмлек серләре белән бүлешә. Шушы бәйгегә әзерлек, безне тагын да якынайтты ди, Шекшедән Алисә Сабирҗанова. Балалар дигәндә, әтиләр дә бердәм катнашкан.
Юлбат төп мәктәбенең ата-аналар комитеты да финал турына узулары белән чиксез горурлана. 9 укучылы бу сыйныфны шулай әзерләүдә укытучыларына рәхмәтле алар. Төрле милләт вәкилләрен берләштерүләре белән дә аерылып тордылар.
Заман белән уку, укыту юнәлешләре дә яңара. Балаларның да аралашу, аңлашу терминнары үзгәрә. Кибәчелеләр үз чыгышларында моңа зур басым ясаган. Нинди генә очрак булмасын белем илендә җитәкләп баручы, төп ярдәмче һәм ышаныч укытучы булып кала.
Ватанпәрвәрлек, илнең лаеклы ул — кызлары булып тәрбияләнү мәктәпнең дә, гаиләнең дә өлеше керә торган зур хезмәт. Җюри бәя биргәндә чыгышларда бу теманың яктыртылуына игътибар итте.
Гимназиялеләр ватан темасына аеруча якын килеп, хәрби хәрәкәтләрдә катнашучы туганы белән әлемтә булдырып, сценарийларын тагын да эчтәлекле иткәннәр. Бу сәламне зал дулкынланып кабул итте.
Укучыларның да укытучыларның да, әти-әниләрнең дә һәркайсының җиңүгә теләге көчле иде. Алар финалга үтүләре белән дә инде җиңүчеләр икәнен беләләр. Ә менә төп җиңүчегә тагын да зур максатлар куела.
Бәйгенең икенче турында мәктәпләр “Бөек сугыш – Бөек җиңү” дип аталган иҗади биремне үтәде. Чыгышлар илебез азатлыгы өчен үз көчләрен, гомерләрен кызганмаган Ватан сакчыларына, гомерләрен аямаган батырлар истәлегенә, бүгенге көндә махсус операция кысаларында хәрби бурычларын намус белән үтәгән солдатларга, офицерларга багышланды. Барлык нәтиҗәләр кушылып төп җиңүче итеп — Шәмәрдән Лицее ата-аналар комитеты билгеләнде.
Алия Галиуллина, Райлә Галәвина, Рәзил Нигъмәтов, Татарстан яңалыклары, Саба районы.
