Россия Президенты Владимир Путин Мисыр коллегасы Әбдел Фәттах әс-Сисины октябрьдә Казанда узачак БРИКС илләре саммитына чакырды.
«Сезне, хөрмәтле Сиси әфәнде, быел октябрь аенда Казанда узачак берләшмә саммитында көтәбез», – диде дәүләт башлыгы «Эль-Дабаа» атом электр станциясенең 4 нче энергоблогы төзелешенә старт биргән тантана вакытында.
Президент билгеләп үткәнчә, «Мисырның БРИКСка керүе белән бәйле рәвештә, нәтиҗәле хезмәттәшлекне арттыру өчен перспективалы мөмкинлекләр ачыла».
«Ассызыклыйм, Россия баштан ук Мисыр ягының бу берләшмәнең тулы хокуклы әгъзасы булу теләген чын күңелдән хуплады. Быел Россия рәислегендә БРИКС барышында без Мисырның берләшмә эшенә нәтиҗәле кушылуы өчен мөмкин булганның барысын да эшләргә тырышачакбыз», – диде Путин.
Ул БРИКС линиясе буенча 200дән артык чара үткәрергә планлаштырылуын һәм Мисыр вәкилләренең аларда актив катнашачагына өмет белдерде.
БРИКС саммиты республика башкаласында октябрьдә узачак, анда 26 дәүләт башлыгы чакырылган. Алданрак Татарстан Рәисе Рөстәм Миңнеханов ассызыклаганча, мондый дәрәҗәдәге чараны үткәрү — республика өчен зур хөрмәт һәм җаваплылык.
