Саба районының Олы Артыш авылында модульле яңа фельдшер-акушерлык пункты ачылды. Аны ачу тантанасында район җитәкчелеге, авыл халкы катнашты. Яңа социаль әһәмиятле обьект, биредә яшәүчеләр өчен, бигрәк тә өлкән яшьтәгеләргә һәм балаларга, медицина ярдәмен уңайлы шартларда алу мөмкинлеген тудырды. Чираттагы язма Саба раойныннан.
“Сәламәтлек” милли проекты кысаларында төзелеп эшли башлаган әлеге фельдшер-акушерлык пункты районыбыз авылларында 17чесе. Авыл халкының шатлыгын уртаклашып тантанага район башлыгы Рәис Миннеханов килде.
Традицион кызыл тасманы кисү, биредә медицина ярдәме күрсәтүче Гөлназ Гасыймуллинага символик ачкыч тапшыру – тантананың күңелле мизгелләре. Яңа бинага танышу өчен беренчеләрдән булып авылның нәни пациентлары үтте. 2013нче елдан бирле авыл кешесен Гөлназ Гасыймуллина дәвалый. Үзен дә бик яраталар. Заманча җихазланыш, уңайлы шартлар аның хезмәтен дә бермә-бер җиңеләйтәчәк.
Медицина ярдәме күрсәтү пунктының элеккеге бинасы янәшәдәге мәдәният йортының 2 бүлмәсендә урнашып эшләгән. Хәзер исә үзе бер аерым бина. Яңа фельдшер-акушерлык пункты ачылуына бигрәк тә авыл өлкәннәре шат.
Медицина объекты Казан шәһәренең җаваплылыгы чикләнгән “СтройСити” җәмгыяте төзүчеләре тарафыннан сафка бастырылган. Чираттагы тагын бер шушындый заманча модульле фельдшер-акушерлык пункты 2024нче елда Урта Саба авылында төзеләчәк.
Раилә Галәвинә, Ләлә Зәйнуллина. Татарстан яңалыклары, Саба районы.
