Казан дәүләт мәдәният институтында «Беренче театр» Бөтенроссия театр иҗат фестивале җиңүчеләрен бүләкләү тантанасы узды. Россия Федерациясе һәм Татарстан Мәдәният министрлыклары, Татарстанның Мәгариф һәм фән министрлыгы ярдәме белән Казан дәүләт мәдәният институты әлеге чараны быел икенче тапкыр оештыра. 1 нчедән алып 11 сыйныфка кадәр фестивальдә катнашучылар, шулай ук, актерлык остаханәсендә дә катнаша алды. Чарада хәбәрчебез дә булып кайтты.
Җанлы оркестр, төрле музыка уен коралларының дәртле көе. Казан дәүләт мәдәният институтында “Беренче театр” фестивале кунакларын шулай каршыладылар.
Әлеге чараны “Беренче театр” дип исемләү – Татарстанның мәгариф һәм фән министры урынбасарының идеясы булган икән.
Профессиональ актер булыр өчен тәнеңне дөрес тоя белергә, сөйләмеңне үстерергә кирәк. Мәдәният институты укытучысы Наталья Плотникованың актерлык остаханәсендә нәни сәхнә сөючеләр 5 сизү органына күнекмәләр ясый. Мондый остаханәләргә йөргән бала, һичшиксез, шәхес буларак та үсә.
Катнашырга теләк белдереп, фестивальгә 80ләп сәхнә әсәренең видеоязмасы килгән икән. Жюри әгзъалары спектакльләрне 12 шәр сәгать бертуктаусыз карап, бәяләргә туры килде, ди.
Сәхнәдә – җиңүчеләр. «Драматик театр», «Курчак театры» һәм «Театральләштерелгән тамаша» номинацияләрендә алар беренчелекне яулады.
Бүләкләү тантанасында Шекспирның сәхнә әсәрен карап, тере тавыш һәм моңлы музыка тыңлап ләззәтләнергә мөмкин булды.
Миләүшә Гыйльфанова, Ирек Хәмидуллин, Татарстан яңалыклары.