Җирлек башлыклары һәм муниципаль хезмәткәрләр советының һәр декабрь съезды бәйрәм кебек. Съездга кадәр профильле министрлар катнашында 3 онлайн конференция узды. Биредә мөһим темалар турында фикер алышу булды — су корылмаларының һәм үләт базларының, юллар һәм күперләрнең торышы, мобилизацияләнгән гаиләләргә ярдәм итү. Калган мәсьәләләр җыелышның пленар өлешенә чыгарылды. Съезд эшендә Татарстан Республикасы Рәисе Рөстәм Миңнеханов та катнашты.
Рөстәм Миңнеханов әйтүенчә, геополитик вәзгыять һәм санкцияләр режимы белән бәйле кыенлыкларга карамастан, Татарстан үсешен дәвам итә. Районнарда яңа юллар, элемтә җайланмалары һәм иҗтимагый оешмалар барлыкка килеп тора. Соңгы елларда үзара салым программасы буенча халык үз җирлекләрен төзекләндерүгә 2 миллиард 400 миллион сум акча керткән. Шуңа республикабыз да 9 миллиард сум өстәгән.
Махсус хәрби операциягә һәрьяклап ярдәм итү һәр чыгышта төп темаларның берсе булды. Рөстәм Миңнеханов моның мөһимлеген аерым ассызыклады. Шәһәр һәм район башлыклары чыгышларында Рәисебезнең шушы авыр вәзгыяттә дә төрле проектларга һәм программаларга ярдәме өчен рәхмәтләрен җиткерде.Гадәттә, декабрь җыелышы матур тәмамлана. Быел да күңелле мизгелләр аз булмады.
Муниципаль җирлекләрнең алдынгы хезмәткәрләренә Россия һәм Татарстан дәүләт бүләкләре тапшырылды. Совет рәисе Әгъзам Гобәйдуллин илебез Президенты Указы белән Почет ордены белән бүләкләнде. Мәгариф һәм фән министры Илсур Хәдиуллинга мәктәп автобуслары алуга сертификат бирелде, ә Лисичанск һәм Рубежный башлыкларына Рөстәм Миңнеханов машина ачкычлары тапшырды. Шулай ук, тиздән кереме аз булган һәм ишле гаиләле балаларның да хыяллары тормышка ашачак. Рөстәм Миңнеханов һәм Минтимер Шәймиев яңа ел чыршысыннан сабыйларның теләкләре язылган хатларны алып укыды. Аларга парламентарийлар, башлыклар, министрлар һәм форум катнашучылары да кушылды.
Миләүшә Гыйльфанова, Дмитрий Второв, Ленар Хабибуллин, Татарстан яңалыклары.
