Шушы көннәрдә Буада район мәдәният йортын ачу тантанасы булып узды, анда Буа дәүләт драма театры урнашкан. Аны реконструкцияләү “Мәдәният” милли проектының “Мәдәни мохит” федераль проекты ярдәмендә мөмкин булды. Тулырак Фәннур Хәсәнов видеоязмасында.
Ниһаять, Буа дәүләт драма театры коллективы яңа бинага күчте. «Мәдәният» милли проекты кысаларында район мәдәният йорты ачылды. Яңартылган бинаны ачу тантанасында Татарстан Республикасы Раисе Рөстәм Миңнеханов та катнашты.
Тарих битләренә күз салсак, Буа шәһәре һәм Буа муниципаль районы-Татарстан Республикасының уникаль төбәге. Буада иң борынгы татар профессиональ театрларының берсе эшли, аның йөз еллык юбилеен 2017 елда билгеләп үттеләр. Буа шәһәренең татар шәкертләре һәм укытучылары иң беренче «Казанга сәяхәт» спектаклен тәкъдим итәләр һәм шул вакыттан алып бүгенге көнгә кадәр Буада театр тормышы кайнап тора.
Театрның яңа тормышы 2002 елның 16 февралендә башлана, Раил Садриев җитәкчелегендәге театр труппасы мәдәният йортында Туфан Миңнуллин пьесасы буенча «Гөргери кияүләре» спектакленең беренче репетициясенә җыела һәм шул вакыттан бирле яшь коллективның бүгенге көнгә 60 тан артык сәхнә әсәре куелышы бар.
Мәдәни учреждениене масштаблы яңарту узган елның икенче кварталында башланды һәм ике этапка исәпләнгән иде. Ремонтланган бинада профессиональ артистлар, музыкаль коллективлар чыгышлары һәм репетицияләре өчен шартлар каралган. Бинаның мәйданы да арта, тамашачыларны сыйдырышлыгы да 400 кешедән артык. Мәдәният йортында бәйрәмнәр, концертлар уздырылачак, мәдәният сараеның яңа бинасында Буа драма театры спектакльләр дә килгән театрлар өчен дә зур мөмкинлекләр ачыла.
Бәйрәм уңаеннан талантлы артистларны һәм әлеге бинаны төзекләндерүдә катнашкан эш алдынгыларын да бүләкләделәр. Иҗат үзәге тирә яктагы һәр коллективны үзенә сыендырыр. Уңышлар юлдаш булсын.
